ލާމަރުކަޒީ ނިޒާމަށް ގެންނަންޖެހޭ ބަދަލުތަކާއި ގުޅޭ ގޮތުން މިނިސްޓަރު އާދަމް ޝަރީފް، ޤާނޫނު އަސާސީ އެކުލަވާލި ކޮމިޓީގެ މުގައްރިރު އިބްރާހީމް އިސްމާޢީލް (އިބްރާ) އާއި ބައްދަލުކުރައްވައި މަޝްވަރާކުރައްވައިފިއެވެ.

މިނިސްޓްރީ އޮފް ސިޓީސް، ލޯކަލް ގަވަރމެންޓް އެންޑް ޕަބްލިކް ވާރކްސްއިން ހާމަކުރައްވާފައިވާ ގޮތުގައި މިބައްދަލުކުރެއްވުން ބާއްވަވާފައި ވަނީ، އިބްރާހީމް އިސްމާޢީލްގެ އާއިލީ ގެކޮޅު، މ. ބޯގަންވިލާގައެވެ. 

އިއްޔެ ހަވީރު ބޭއްވި މި ބައްދަލުވުމުގައި ސްޓޭޓް މިނިސްޓަރ މޫސާ ފަތުޙީ އާދަމާއި، މުޙައްމަދު ހާޝިމާއި، މުޙައްމަދު މާހިރު ބައިވެރިވެ ވަޑައިގެންނެވި ކަމުގައިވެސް އެމިނިސްޓްރީން ހާމަކުރައްވާފައިވެއެވެ. ޤާނޫނު އަސާސީ އެކުލަވާލި ކޮމިޓީގެ މުޤައްރިރުކަން ކުރެއްވި، އިބްރާހީމް އިސްމާޢީލަކީ ލާމަރުކަޒީ ނިޒާމު އެކަށައެޅުމުގައި އެންމެ އިސްކޮށް މަސައްކަތްކުރެއްވި ބޭފުޅުންގެ ތެރޭގައި ހިމެނި ވަޑައިގެންނެވި ބޭފުޅެކެވެ. އަދި ލާމަރުކަޒީ ޤާނޫނަށް މުހިއްމު ގިނަ ބަދަލުތަކެއް ގެންނަން ޖެހޭކަން އޭނާ ވަނީ ފާހަގަކުރައްވާފައެވެ.

މިސަރުކާރުން ވަނީ، ލާމަރުކަޒީ ނިޒާމަށާއި ދައުލަތުގެ އިދާރީ ހިންގުމުގައި ކައުންސިލްތަކުގެ އަދާކުރާ ދައުރަށް ބަދަލުތަކެއް ގެނައުމަށް ޤާނޫނުތަކަށް އިސްލާޙް ގެނައުމުގެ މަސައްކަތްތަކެއް ފަށާފައެވެ. އޭގެ ތެރެއިންވެސް އެންމެ ބޮޑަށް ދެކެވެމުން އަންނަ ވާހަކަކީ، ކައުންސިލްތަކުގެ މެމްބަރުންގެ އަދަދު މަދުކުރުމުގެ ވާހަކަތަކެވެ.