ފޮރިން މިނިސްޓަރު މޫސާ ޒަމީރާއި ސަރުކާރުގެ ޚާއްޞަ ވަފުދުގެ ބޭފުޅުން، ސަޢޫދީޢަރަބިއްޔާއަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން އިއްޔެ، ސަޢޫދީ ޢަރަބިއްޔާގެ މަރުކަޒީ ބޭންކުގެ ގަވަރުނަރު އައިމަން އަލް ސަޔާރީ އާއި ބައްދަލުކުރައްވައިފިއެވެ.

މިބައްދަލުކުރެއްވުމާއި ގުޅޭ މައުލޫމާތު ފޮރިން މިނިސްޓަރ މޫސާ ޒަމީރު ވަނީ، ހާމަކުރައްވާފައެވެ. މިގޮތުން، އެ ބައްދަލުވުމުގައި، ރާއްޖޭގެ އިޤުތިޞާދީ ޙާލަތު މިހާރު އޮތް ގޮތް ދަންނަވައި، ފަތުރުވެރިކަމުގެ ސިނާޢަތުގައި ހޯދެމުން އަންނަ ކުރިއެރުންތަކާއި، ރާއްޖޭގައި ބޭރުގެ ފަރާތްތަކަށް އިންވެސްޓް ކުރެވެން ހުރި ދާއިރާތަކާއި ގުޅޭ ގޮތުން މަޝްވަރާ ކުރެއްވި ކަމުގައި، މިނިސްޓަރ ޒަމީރު ހާމަކުރެއްވިއެވެ. 

މީގެ އިތުރުން ސަޢޫދީޢަރަބިއްޔާ އާއި ދިވެހިރާއްޖެއާއި ދެމެދުގައި އޮތް ގާތް ރަޙްމަތްތެރިކަމުގެ ގުޅުން ކުރިޔަށް އޮތް ތަނުގައި އިތުރަށް ބަދަހި ކުރުމާއި ގުޅޭ ގޮތުންވެސް ދެބޭފުޅުން މަޝްވަރާކުރެއްވި ކަމުގައި ފޮރިން މިނިސްޓަރ މޫސާ ޒަމީރު ވިދާޅުވިއެވެ.