މާލޭގެ މަގުމަތީގައި އުޅޭ ބުޅާތައް ހިފައި މަރައިގެން އެ ބުޅަލުގެ މަހުގައި ކާބޯތަކެތި ތައްޔާރު ކުރަމުން ދިޔަކަމުގެ ތުހުމަތު ކުރެވުނު، ޢަރަފާތު ހުސައިން ހޯދައި ހައްޔަރުކޮށްފިއެވެ.

ފުލުހުންގެ އިދާރާއިން ވިދާޅުވީ އޭނާ ހައްޔަރުކުރީ، މާލެއިން މިއަދު ހެނދުނު 10:32 ހާއިރުގައި ކަމަށެވެ. އޭނާ ހައްޔަރުކޮށްފައި ވަނީ، ދިލްބަހާރު މަގުގައި ހުންނަ ސެލޫނަކަށް ބޯކޮށަށް ވަދެ ހުއްޓައެވެ. 

އަރަފާތުގެ މައްސަލަ ޖަނަވާރާއި ބެހޭ ވުޒާރާއިންވެސް އިއްޔެ ވަނީ ފުލުހުންނަށް ހުށައަޅާފައެވެ. އަދި އޭނާ ހޯދުމުގެ މަސައްކަތް މޯލްޑިވްސް އިމިގްރޭޝަނުންވެސް ދިޔައީ ކުރަމުންނެވެ. 

އޭނާގެ މައްސަލަ ފުލުހުންނާއި އިމިގްރޭޝަނުން އަދި ސަރުކާރުގެ އިދާރާތަކުން ބަލަން ފެށީ، އިއްޔެ ސޯޝަލް މީޑިއާގައި އާއްމުންނާއި، ޖަނަވާރުގެ ހައްޤުތަކަށް މަސައްކަތް ކުރާ ގުރޫޕަކުން އޭނާގެ މައްސަަލަ ފެންމަތި ކުރުމާއި ގުޅިގެންނެވެ.

އޭނާއަކީ، މާލޭގެ މަގުމަތީގައި އުޅޭ ބުޅާތައް ހިފައިގެން އެބުޅާތައް މަރައި އޭގެ މަހުގައި ކާބޯތަކެތި ތައްޔާރުކޮށް ވިއްކަމުން ގެންދިޔަ މީހެއްކަން ވަނީ ފަޅާއަރާފައެވެ. ބިދޭސީންނަށް އޭނާ ކާބޯތަކެތި ތައްކާރުކޮށް ވިއްކާއިރު، ކަންމަތީ ކުދި ފިހާރަތަކާއި، ކޮފީ ޝޮޕްތައް ފަދަ ތަންތަނަށް އޭނާ ބާގާ އާއި ސަބްމެރިން ހަދައިގެން ގެންގޮސް ވިއްކާ ކަމަށް އާއްމު ފަރާތްތަކުން ވަނީ ފާހަގަކޮށްފައެވެ.