ކޮރަޕްޝަންގެ ގިނަ ތުހުމަތުތަކަކާއެކު ބޮއްސުންލާފައިވާ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ހިންގުން ހަވާލުކުރުމަށް ފީފާ އިން ނިންމާފައިވާ ނޯމަލައިޒިން ކޮމިޓީ އެކުލަވާލައިފިއެވެ. އެ ކޮމެޓީގެ ޗެއާމަނަކަށް ފީފާއިން ހަމަޖައްސާފައިވަނީ ކުރީގެ ޔޫތު އެންޑް ސްޕޯޓްސް މިނިސްޓަރު، އަހުމަދު ޒުހޫރުއެވެ.

އެފްއޭއެމްގެ ހިންގުން ނޯމަލައިޒިންގ ކޮމެޓީގެ ދަށަށް ގެންދިއުމަށް ފީފާއިން ނިންމާފައިވަނީ މިދިޔަ މަހުގެ 23 ވަނަ ދުވަހުއެވެ. އެ ކޮމިޓީ ފައިނަލްކޮށް، ހޯމަ ދުވަހު އެފްއޭއެމަށް އަންގާފައިވާއިރު، ޗެއާމަންކަން ހަވާލުކުރެއްވި، ޒުހޫރުގެ އިތުރުން ކޮމިޓީގައި ދެން ހިމެނޭ މެމްބަރުންނަކީ، ފަރީހާ ޝަރީފް، އަހުމަދު މުއިއްޒު، އިސްމާއިލް ސިމަން އަދި އަހްމަދު އަލީއެވެ.

ނޯމަލައިޒް ކޮމެޓީއެއް އައްޔަން ކުރަން ނިންމި ނިންމުމާ ގުޅިގެން ފީފާގެ ބަޔާނުގައި އިތުރަށް ފާހަގަ ކޮށްފައިވާ ގޮތުން، ނޯމަލައިޒޭޝަން ކޮމިޓީއެއް ޔައްޔަން ކުރަން ނިންމީ އެ އެސޯސިއޭޝަން ކުރިމަތިވެފައިވާ ދޯހަޅި ހިންގުމުގެ މައްސަލަތަކުގެ އިތުރަށް މާލީ ގޮތުން ކުރިމަތިވެފައިވާ ބޮޑެތި ގޮންޖެހުންތަކަށް އަރައިގަތުމުގެ ގޮތުންނެވެ.

ނޯމަލައިޒިންގ ކޮމެޓީ ހިންގުމަށް ހަވާލުކުރެއްވި ޒުހޫރަކީ، މީގެ ކުރިން ރައީސް އަބްދުﷲ ޔާމީންގެ ސަރުކާރުގައި މިނިސްޓްރީ އޮފް ޔޫތު އެންޑް ސްޕޯޓްސްގެ މަގާމު އަދާކުރެއްވި ބޭފުޅެކެވެ. އަދި ޒުހޫރު ވަނީ މީގެ ކުރިން، ކަސްޓަމްސްގެ ކޮމިޝަނާ ޖެނެރަލް ކަމުގެ އިތުރުން ސްޓެލްކޯގެ މެނޭޖިން ޑިރެކްޓަރުކަން ވެސް ކުރައްވާފައެވެ. މި ސަރުކާރުން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ޗެއާމަނަކަށް ވެސް ޒުހޫރު ހަމަޖައްސާފައިވެއެވެ. އެކަމަކު، ފަހުން އޭނާ އެ މަގާމުން ވަކިކުރިއެވެ.  

ނޯމަލައިޒިން ކޮމެޓީއަށް ދިނުމަށް ފީފާ އިން ނިންމާފައިވަނީ 1 އަހަރު ދުވަހުގެ މުއްދަތެކެވެ. އަދި އެ ކޮމެޓީގެ ޒިންމާތައް އެ މުއްދަތުގެ ކުރިން ނިންމައިފިނަމަ، ކޮމެޓީގެ ދައުރު ނިމޭނެކަމަށް ވެސް ބުނެފައިވެއެވެ. މައްސަލަތައް ހައްލުކޮށް އެފްއޭއެމް އިންތިހާބުކޮށް ނިންމަން ޖެހޭ އެންމެ ފަހު މުއްދަތެއްގެ ގޮތުގައި އެ ކޮމިޓީ އަށް ފީފާއިން ދިނީ އަންނަ އަހަރުގެ ޖުލައި 31 ގެ ނިޔަލަށެވެ.