މަގުމަތީގައި އުޅޭ ބުޅާތައް ހިފައި މަރައި އަދި އޭގެ މަހުގައި ބާގާ އާއި ސަބްމެރިންފަދަ ކާބޯތަކެތި ހަދައިިގެން ވިއްކި ކަމުގެ ތުހުމަތު ކުރެވުނު މީހާ އާއި ދެކޮޅަށް ޖަނަވާރާއި ބެހޭ މިނިސްޓްރީން ފުލުހުންނަށް މައްސަލަ ހުށައަޅައިފއެވެ.

މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއާއިން ހާމަކުރައްވާފައިވާ ގޮތުގައި އެމިނިސްޓްރީއަށް އެކަމުގެ މައުލޫމާތު ލިބުމާއި ގުޅިގެން އިއްޔެ އެމައްސަަލަ އެމިނިސްޓްރީގެ ފަރާތުން ފުލުހަށް ހުށައަޅައި، އެމީހާ އާއި މެދު ފިޔަވަޅު އަޅައިދިނުމަށް ވަނީ އެދިފައެވެ.

އެމިނިސްޓްރީން ވިދާޅުވީ، މަގުމަތީގައި އުޅޭ ބުޅާ ހިފާ މީހެއްގެ ގޮތުގައި ތުހުމަތު ކުރެވޭ ފަރާތަކާ ބެހޭ މަޢުލޫމާތު، އިއްޔެ ހެނދުނު އަމިއްލަ ފަރާތަކުން މި މިނިސްޓްރީއާ ހިއްސާކުރުމާ ގުޅިގެން، އެ މައްސަލަ ވާނީ މޯލްޑިވްސް ޕޮލިސް ސަރވިސްއަށް ހުށަހަޅާފައިކަމަށެވެ. އަދި މިހާރު ދިވެހި ފުލުހުންގެ ޚިދުމަތުން ދަނީ އެ މައްސަލަ ތަޙްޤީޤުކުރަމުން ކަމަށާއި، އަދި އެ މިނިސްޓްރީންވެސް މި މައްސަލައިގެ ތަޙްޤީޤު ކުރިއަށްދާ ގޮތް ވަރަށް ގާތުން ބަލަމުން ދާކަމުގައިވެސް އެމިނިސްޓްރީން ވަނީ ވިދާޅުވެފައެވެ.

އިއްޔެ މޯލްޑިވްސް އިމިގްރޭޝަނުންވެސް ވަނީ މި މައްސަލައިގައި ތުހުމަތުކުރެވޭ މީހާ ހޯދުމަށް އާއްމު ނޯޓިހެއް ނެރެފައެވެ. މިމައްސަލައިގައި ހޯދަމުން ދަނީ، ބަނގުލަދޭޝް މީހެއް ކަމުގައިވާ، އަރަފާތު ހުސައިން ނަމަކަށް ކިޔާ 32 އަހަރުގެ މީހެކެވެ.