ބިޒްނަސް ސެންޓާ ކޯޕަރޭޝަން ސެންޓަރުން، އެންމެ ކުދި އަދި ކުދި ވިޔަފާރިތަކަށް ހާއްސަކުރި އެސްއެމްއީ ހަބްގައި ޤަވާއިދާއި ޚިލާފަށް ވިޔަފާރި ހިންގަމުން ދިޔަ ބިދޭސީ 3 މީހަކު ހޯދައި އެމީހުން އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.

އިމިގްރޭޝަނުން ހާމަކޮށްފައިވާ ގޮތުގައި، އެސްއެމްއީ ހަބްގެ ސްޓޯލްތަކުގައި ޤަވާއިދާއި ޚިލާފަށް ބިދޭސީން ވިޔަފާރިކުރަމުން ދިޔަކަމުގެ ރިޕޯޓްކޮށްފައި ވަނީ، "އިމިގްރޭޝަން ވޮޗް" މެދުވެރިކޮށެވެ. 

އެސްއެމްއީ ހަބުގައި ޤަވާއިދާއި ޚިލާފަށް ވިޔަފާރި ހިންގަމުން އައި ބިދޭސީންތަކެއް އިމިގްރޭޝަނުގެ ބެލުމުގެ ދަށަށް ގެންދިޔަ އިރު، އެތަނަކީ، ދިވެހިން އަލަށް ވިޔަފާރި ފަށައި، ޕްރޮމޯޓުކޮށްދިނުމަށް އެހީތެރިވުމުގެ ބޭނުމުގައި ހުޅުވި ތަނެކެވެ.

"އިމިގްރޭޝަން ވޮޗް"އަކީ، ޤަވާއިދާއި ޚިލާފަށް އުޅެމުންދާ ބިދޭސީންނާއި ޤަވާއިދާއި ޚިލާފަށް ބިދޭސީން ހިންގަމުން ގެންދާ ވިޔަފާރިތަކާއި ގުޅޭ މައުލޫމާތު، ހުށައެޅުމަށް ޤާއިމްކޮށްފައިވާ ޕޯޓަލް އެކެވެ. 

މީގެ އިތުރުން، ދުފުމަށް ބޭނުން ކުރާ ފޯއް، ނުތާހިރު ތަނެއްގައި ތައްޔާރުކޮށް ވިއްކަމުން ދިޔަ ބިދޭސީންތަކެއްވެސް އިމިގްރޭޝަނުން ވަނީ އަތުލައިގެންފައެވެ. ޤަވާއިދާއި ޚިލާފަށް އުޅެމުން ދިޔަ އެބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފައި ވަނީ، މ. ރީތި އޯކިޑް ގެއިންނެވެ. އެގޭގައި ދެ ބިދޭސީއަކު ވެގެން ފޯއް ގެންދިޔައީ ވިއްކަމުންނެވެ.