މާލޭ މަގުމަތީގައި އުޅޭ ބުޅާ ހިފައި މަރައިގެން އޭގެ މަހުން، ބާގާ އާއި ސަބްމެރިން ފަދަ ކާބޯތަކެތި ތައްޔާރުކޮށް ވިއްކި ކަމަށް ތުހުމަތު ކުރެވޭ ބަނގުލަދޭޝް މީހަކު ހޯދަން އިމިގްރޭޝަނުން އިއުލާނުކޮށްފިއެވެ.

އިމިގްރޭޝަނުން ހޯދަން އިއުލާނުކޮށްފައި ވަނީ، އަރަފާތު ޙުސައިން ނަމަކަށް ކިޔާ، އުމުރުން 32 އަހަރުގެ ބަނގުލަދޭޝް ފިރިހެނެކެވެ. 

އޭނާ މީގެ ކުރިން މާލޭގެ މަގުމަތުން ބުޅާ ހިފައިގެން ޕްލާސްޓިކް ކޮތަޅަށް ލާން އުޅެނިކޮށް ބައެއް މީހުންނަށް ފެނި ކުރިން ކޮށްފައިވާ ވީޑިއޯއެއްވެސް މިހާރު ސޯޝަލް މީޑިއާގައި ދަނީ ދައުރުވަމުންނެވެ. އަދިއޭނާ އުޅުނު ގޭގައި ދިރިއުޅޭ ބައެއް މީހުން ވަނީ، އެ ބިދޭސީ މީހާ އުޅުނު ތަނުން ބުޅާ ރޯއަޑު އިވޭކަމަށާއި، އަދި ބުޅަލުގެ ބައެއް ގުނަވަންތައްވެސް ފެނިފައިވާކަން ސޯޝަލް މީޑިއާގައި ހާމަކޮށްފައެވެ.

ޤަވާއިދާއި ޚިލާފަށް އުޅޭ ބިދޭސީންނާއި ޤަވާއިދާއި ޚިލާފަށް އުޅޭ ބިދޭސީން ހިންގާ ވިޔަފާރިތައް ހުއްޓުވުމަށް އިމިގްރޭޝަނުން ފަށާފައިވާ އޮޕަރޭޝަނުގެ ތެރެއިންވެސް ދަނީ، މުޑުދާރުތަންތަނުގައި ކާބޯތަކެތި ހަދައިގެން ވިއްކާ ބިދޭސީން އަތުލައިގަންނަމުންނެވެ.