ގައުމަށް ބޮޑުކަމެއް ދިމާވާ ކޮންމެ ހިނދެއްގައި އެންމެ ކުރީސަފުގައި އަބަދުވެސް ޢަދާލަތު އޮންނާނެ ކަމުގައި ޢަދާލަތު ޕާޓީގެ ރައީސް އައްޝައިޚް ޢިމްރާން ޢަބްދުﷲ ވިދާޅުވެއްޖެއެވެ.

ޝައިޚް އިމްރާން މިހެން ވިދާޅުވީ، އަދާލަތު ޕާޓީގެ 19 ވަނަ  އަހަރީ ދުވަހުގެ ހެޔޮ އެދުމާއި ތަޙްނިޔާ ފޮނުއްވައި ކުރެއްވި ޕޯސްޓްގައެވެ.

ޢަދާލަތު ޕާޓީގެ 19 ވަނަ އަހަރީ ދުވަހާއި ގުޅިގެން ސިޔާސީ ލީޑަރުންނާއި، ސިޔާސީ ޕާޓީތަކުން ގެންދަނީ އެޕާޓީއަށް ތަޙްނިޔާގެ މެސެޖުތައް ފޮނުވަމުންނެވެ. ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފާއި، އެމްޑީޕީގެ ޗެއާޕަރސަން ފައްޔާޒް އިސްމާޢީލާއި، އެމްޑީޕީންވެސް ވަނީ އަދާލަތު ޕާޓީއަށް މަރުޚަބާކިޔައި ދުވަހުގެ ހެޔޮ އެދުމާއި ތަޙްނިޔާ ފޮނުއްވާފައެވެ.

ޢަދާލަތު ޕާޓީއަކީ، މިހާރު ރާއްޖޭގައި އޮތް ދެވަނައަށް އެންމެ ގިނަ ދުވަސްވީ ޕާޓީއެވެ. އެޕާޓީ އުފެދުނީ، 18 އޮގަސްޓް 2005 ގައެވެ.