ގ. ހީނާމާގެ ޕާކިން ސަރަހައްދުން ބަލައި ފާސްކުރެވުނު ބިދޭސީންގެ ތެރެއިން، ރާއްޖޭގައި މަސައްކަތް ކުރުމުގެ ހުއްދަ ނެތް 14 ބިދޭސީއަކު އިމިގްރޭޝަން ބެލުމުގެ ދަށަށް ގެންގޮސްފައިވާ ކަމުގައި އިމިގްރޭޝަނުން ވިދާޅުވެއްޖެއެވެ.

އިމިގްރޭޝަނުން ވިދާޅުވެފައިވާ ގޮތުގައި އިމިގްރޭޝަންގެ ބެލުމުގެ ދަށަށް އެ މީހުން ގެންގޮސްފައި ވަނީ، މާލޭގައި ގަވާއިދާ ހިލާފަށް އުޅޭ ބިދޭސީންނާ ގުޅޭގޮތުން "އިމިގްރޭޝަން ވޮޗް" އަށް ލިބިފައިވާ މައުލޫމާތާ ގުޅިގެން އިއްޔެ ހެނދުނު ކުރިޔަށް ގެންދިޔަ ރެއިޑު އޮޕަރޭޝަނެއްގައެވެ.

މީގެ އިތުރުން، މާފަންނު ސަރަހައްދުގައި، ބިދޭސީން ދިރިއުޅެމުންދާ އެކަމަޑޭޝަން ބްލޮކެއްގެ މައުލޫމާތު މާލޭ ސިޓީކައުންސިލުން އިމިގްރޭޝަނާއި ޙިއްސާކުރުމާއި ގުޅިގެން، އެތަން ބަލައި ފާސްކޮށް، ޤަވާއިދާ ޚިލާފަށް އުޅެމުންދިޔަ 08 ބިދޭސީއަކު އެތަނުންވެސް ވަނީ އިމިގްރޭޝަން ބެލުމުގެ ދަށަށް ގެނެވިފައި ކަމުގައި އިމިގްރޭޝަނުން ވިދާޅުވިއެވެ.  

މާލެ ސަރަހައްދުގައި ޤަވާއިދާއި ޚިލާފަށް އުޅޭ ބިދޭސީން ހޯދައި އެމީހުން ޑީޕޯޓްކުރުމުގެ މަސައްކަތް އިމިގްރޭޝަނުން ވަނީ ފަށާފައެވެ. 

އިމިގްރޭޝަނާ ގުޅުންހުރި މައްސަލަ ރިޕޯޓްކުރުމަށް ޚާއްސަ އޮންލައިން ޕޯޓަލް "އިމިގްރޭޝަން ވޮޗް"އަށް މިހާތަނަށް، 300 ވުރެ ގިނަ މައްސަލަ ރިޕޯޓްކޮށްފައިވެއެވެ.