ރައީސުލްޖުމްހޫރިއްޔާ އެންގެވުމަށް، ސަރުކާރުގެ ޚަރަދުގައި އަމިއްލަ މީހެއްގެ ގެ ތަޅައިދިނުމުގެ މަސައްކަތް، ފަށާފައިވާ ކަމުގައި، ލޯކަލް ގަވަނެންސް އެންޑް ޕަބްލިކް ވޯކްސް މިނިސްޓަރ އާދަމް ޝަރީފް ޢުމަރު ވިދާޅުވެއްޖެއެވެ.

މިނިސްޓަރ އާދަމް ޝަރީފް އެކްސްގައި ކުރެއްވި ޕޯސްޓެއްގައި ވިދާޅުވީ، މ. ރަބީޢު ވިލާ ތަޅާލުމުގެ މަސައްކަތް ކުރަމުން ދަނީ، އެއިމާރާތުގެ ސަބަބުން މީހަކަށް ނުރައްކަލެއް ލިބިދާނެކަމަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ފެނިވަޑައިގަންނަވާތީ، ސީދާ އެމަނިކުފާނު ދެއްވި އިރުޝާދުގެ ދަށުން ކަމަށެވެ. އަދި އެމަސައްކަތް ކުރަމުން ދަނީ، ލޯކަލް ގަވަނެންސް އެންޑް ޕަބްލިކް ވޯކްސް މިނިސްޓްރީގެ މުވައްޒަފުންނާއި ވަޞީލަތްތައް ބޭނުންކޮށްގެން ކަމުގައިވެސް އާދަމް ޝަރީފް ވަނީ ފާހަގަކުރައްވާފައެވެ.

މ. ރަބީޢުވިލާއަކީ، އަކިރި އާއި މުރަކަވެލި ބޭނުންކޮށްގެން ކޮންކްރީޓްއަޅައި، 90ގެ އަހަރުތަކުގެ ތެރޭގައި 6 ބުރިއަށް އިމާރާތްކޮށްފައިވާ ގެއެކެވެ. އެގެ ބާވެ ދިރިނޫޅެވޭ ވަރުވުމުގެ ސަބަބުން އެގެއިން މީހުން ނުކުމެފައިވާތާ އެތައް އަހަރެއް ވަނީ ވެފައެވެ. އެގެ ފަޅަށް ހުންނާތީ، މާލޭގައި އުޅޭ މަސްތުވާތަކެތި ބޭނުން ކުރާ މީހުން އެމީހުންގެ އައްޑާއެއްގެ ގޮތުގައި އެގެ އައީ ބޭނުން ކުރަމުންނެވެ.

އެގޭގެ ތެރޭގައި މަސްތުވާތަކެތި ބޭނުންކުރި، ޒުވާނަކު އޯވަރޑޯޒްވެގެން ނިޔާވެފައި އޮއްވައި މިދިޔަ މެއިމަހުގެ ތެރޭގައި ވަނީ ފެނިފައެވެ. އޭނާގެ ހަށިގަނޑު ފެނުނީ މަރުވެފައި އޮންނަތާ 3 ދުވަސްފަހުން ހަށިގަނޑު ކުނިވެފައި އޮއްވައެވެ. އޭގެ އިތުރުން، އެގޭގެ ހަތަރުވަނަ ފަންގިފިލާގައި މިއަހަރުގެ އޭޕްރީޅް މަހުގެ ތެރޭގައި އަލިފާނުގެ ބޮޑު ހާދިސާއެއްވެސް ވަނީ ހިނގާފައެވެ.

މާލޭގައި އަކިރި އާއި މުރަކަވެލި އިމާރާތްކުރަމުން ދިޔަ ޒަމާނުގައި އިމާރަތްކޮށްފައިވާ ބައެއް ގޭގެ މިހާރު ހުރީ، ދިރިނޫޅެވޭ ވަރަށް ބާވެ ތަޅާލަން ޖެހިފައެވެ. އެހެން ނަމަވެސް އެގޭގޭގެ ވެރިފަރާތްތަކަށް އެގެތައް ތަޅާނުލެވުމާއި ގުޅިގެން އެކަމުގެ ސަބަބުން އާއްމުން ނުރައްކަލަށް ހުށައެޅިގެންދާތީ، އެފަދަ ގޭގެ ސަރުކާރުގެ ޚަރަދުގައި މީގެ ކުރީގެ ދައުރުތަކުގައިވެސް ތަޅާލާފައިވެއެވެ.