ކެންސަރު ބަލީގެ ގިނަ ފަރުވާތަކެއް މިހާރު ރާއްޖެއިން ދެވޭކަމަށް، ކެންސަރު ބަލީގެ ފަރުވާއަށް ހާއްސަ ޑޮކްޓަރ މުޙައްމަދު ޝިފާން ވިދާޅުވެއްޖެއެވެ. ޑރ. ޝިފާން މިހެން ވިދާޅުވީ، "ނޫން" ގެ ހާއްސަ ޕްރޮގްރާމް، "ކޮފީ ވިތު ސުލޭމާނު" ގައި ވާހަކަފުޅު ދައްކަވަމުންނެވެ.

އެގޮތުން ކެންސަރު ބައްޔަށް ރާއްޖެއިން ދެވޭ ފަރުވާތައް ކިޔައިދެއްވަމުން ޑރ. ޝިފާން މިސާލު ޖެއްސެވީ އުރަމައްޗަށް ޖެހޭ ކެންސަރުންނެވެ. އެގޮތުން، އޮޕަރޭޝަން ކޮށްގެން ކެންސަރު ބަލީގެ ސެލްތައް ހަށިގަނޑުން ނެގުމާ، އަދި އެ އޮޕަރޭޝަނަށްފަހު އެ އޮޕަރޭޓު ކުރެވުނު ތަން އަލުން ހެދުން ހިމެނެއެވެ.

ނަމަވެސް، ކެންސަރުޖެހޭ ތަނަށް ރޭޑިއޭޝަން ދިނުމަކީ އަދި ރާއްޖޭގައި ނުކުރެވޭ ކަމެއް ކަމަށް ޑރ. ޝިފާން ވިދާޅުވިއެވެ. ކެންސަރުގެ ފަރުވާގައި ރޭޑިއޭޝަން ދެނީ، ކެންސަރު ސެލްތައް އޮޕަރޭޓުކޮށްގެން ނެގުމަށްފަހު އެ ސެލްތައް އިތުރަށް އުފެދުނަ ނުދީ، އެ ސެލްތައް މަރާލުމަށެވެ.

ރާއްޖޭގައި ކެންސަރަށް ދެވޭ އިތުރު ފަރުވާތައް ކިޔައިދެއްވަމުން ޑރ. ޝިފާން ވިދާޅުވީ، އޮޕަރޭޝަން ކޮށްގެން ނަގާ ބައިތައް ތަހުލީލުކޮށް، އެ ތަހުލީލުތަކުގެ ރިޕޯޓުތަކަށް ބަލައި އިތުރު ފަރުވާތައް ވެސް މިހާރު ރާއްޖެއިން ދެވެއެވެ. އެގޮތުން މި ފަރުވާތަކުގައި އިތުރަށް ތަރައްގީ ކުރަންޖެހޭ ކަންކަން ހުރި ނަމަވެސް، ރާއްޖެއިން ދެވޭ ފަރުވާތަކުގެ ތެރޭގައި ކީމޯ ތެރަޕީ އާއި ހޯމޯން ތެރަޕީ އާއި އިމިއުނޯ ތެރަޕީ ދިނުން ހިމެނެއެވެ.

އަދި މީގެ އިތުރުން، ކެންސަރު ބަލީގެ ފަރުވާތައް ރާއްޖޭގައި ފަށައިގަތް އިރު ލިބެން ނެތް ބޭސްތައް، ދަތިކޮށް ނަމަވެސް މިހާރު ލިބެން ހުންނަ ކަމަށް ޑރ. ޝިފާން ވަނީ ވިދާޅުވެފައެވެ.

ކެންސަރު ބަލިން ރައްކާތެރިވުމަށް ކުރެވިދާނެ ކަންކަމަށް އަލިއަޅުވާލައްވަމުން ޑރ. ޝިފާން ވިދާޅުވީ، ކެންސަރު ބައްޔަކީ އާދައިގެ ބައްޔެއް ނޫންކަމެވެ. އެއީ އެ ބަލީގައި ޖިސްމާނީ ގޮތުން ހަށިގަނޑަށް ލިބޭ ނިކަމެތިކަމުގެ އިތުރުން، ނަފްސާނީ ގޮތުން ބަލިމީހާ އަށާއި ބަލިމީހާގެ އާއިލާއަށް ލިބޭ ގެއްލުން ބޮޑުކަމުންނެވެ. އެހެންކަމުން އެ ބަލިން ރައްކާތެރިވުމަށް ކުރަންޖެހޭ ކަންކަން ކުރުމަކީ މުހިންމުކަމެއް ކަމަށް ވިދާޅުވިއެވެ. އެގޮތުން، ބަލީގެ އަލާމާތްތައް ދެނެގަނެ، ސްކްރީން ކުރެވޭ ބާވަތްތަކުގެ ކެންސަރަށް ސްކްރީންކޮށް، ބަލި ކުރިން ދެނެގަންނަން މަސައްކަތް ކުރުމަށް ޑރ. ޝިފާން ވަނީ ގޮވާލައްވާފައެވެ.

ޑރ. ޝިފާންގެ ހިދުމަތުގެ މުއްދަތުގައި މިހާތަނަށް އެންމެ ގިނަ ދުވަހު މަސައްކަތް ކުރައްވާފައިވަނީ، އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގެ ސާޖަރީ ޑިޕާޓުމެންޓުގައެވެ. އެ ޑިޕާޓުމެންޓުގެ އެކި ހަރުފަތްތަކުގައި މަސައްކަތް ކުރައްވަމުން ގޮސް، ޑރ. ޝިފާންވަނީ އެ ޑިޕާޓްމެންޓާއި ހަވާލުވެގެން ވެސް މަސައްކަތް ކުރައްވާފައެވެ. އަދި އޭގެ ފަހުން ކެންސަރުގެ ފަރުވާއަށް ހާއްސަ ޑިޕާޓްމެންޓެއް އައިޖީއެމްއެޗްގައި އުފެއްދި ފަހުން މަސައްކަތް ކުރައްވަމުން އަންނަވަނީ އެ ޑިޕާޓްމެންޓުގައެވެ.

މުޅި އެޕިސޯޑު ބައްލަވާ ލެއްވުމަށް ތިރީގައިވާ ލިންކަށް ޒިޔާރަތްކުރައްވާ!