Advertisement
އައިޖީއެމްއެޗް -- ފޮޓޯ: ސޯޝަލް މީޑިއާ
މަސްތުވުމުގެ ތުހުމަތު ކުރެވުނީ ދިވެހި އަންހެން ނަރުހަކަށް، މިހާރު ހުރީ މަޤާމް ދަށްކޮށް ސަސްޕެންޑްކޮށްފައި: އައިޖީއެމްއެޗް
މަސްތުވާތަކެތި ބޭނުން ކުރާ ކަމުގެ ތުހުމަތު ކުރެވުނު، ނަރުސް ހުރީ، މަޤާމު ދަށްކޮށް އަދި ސަސްޕެންޑްކޮށްފައި ކަމުގައި އައިޖީއެމްއެޗުން ވިދާޅުވެއްޖެއެވެ.
އައިޖީއެމްއެޗުން ވިދާޅުވީ، މަސްތުވުމުގެ ތުހުމަތު ކުރެވި، ހޮސްޕިޓަލުން ފިޔަވަޅު އަޅާފައިވަނީ، އަންހެން ދިވެހި ނަރުހަކަށް ކަމަށެވެ. އޭނާއަކީ، ކުރިން ވޯޑް އިންޗާޖެއްގެ ގޮތުގައި މަސައްކަތް ކުރި ނަރުހެއް ކަމަށާއި އެހެން ނަމަވެސް އޭނާގެ މަސައްކަތުގެ ފެންވަރަށް ބެލުމަށް ފަހު، އޭނާގެ މަޤާމު ދަށްކޮށް، ވާޑު އިންޗާޖު ކަމުގެ ވަޒީފާގެ މަސްއޫލިއްޔަތު އޭނާގެ ކިބައިން މީގެ ދެ މަސްދުވަސް ކުރިން ނަގާފައި ވާކަމަށެވެ.
އަދި އޭނާ މަސްތުވާތަކެތި ބޭނުން ކުރާ ކަމަށް ކުރެވުނު ތުހުމަތުތަކާއި ގުޅިގެން ވަޒީފާއިން ސަސްޕެންޑްކޮށްފައިވާ ކަމުގައިވެސް ހޮސްޕިޓަލުން ވަނީ ބުނެފައެވެ.
ފުލުހުންގެ އިދާރާއިން ވިދާޅުވީ، މީގެ ފަސްވަރަކަށް ދުވަސް ކުރިން އެފަދަ މައްސަލައެއް އައިޖީއެމްއެޗް އިން ފުލުހުންނަށް ހުށައަޅާފައިވާ ކަމަށާއި އަދި އެމައްސަލަ ފުލުހުން ބަލަމުން ގެންދާ ކަމަށެވެ. އެހެންނަމަވެސް ތުހުމަތު ކުރެވުނު ނަރުސްމީހާ ހައްޔަރުކޮށްފައި ނުވާ ކަމުގައިވެސް ފުލުހުންގެ އިދާރާއިން ވިދާޅުވިއެވެ.
