މާލޭގެ މަގުތަކުގައި ހިނގާބިނގާވެ އުޅޭ މީހުންނަށް އުނދަގޫވާނޭހެން، ޕޭވްމަންޓުތައް ބްލޮކްވާ ގޮތަށް ޕާކުކޮށްފައި ހުންނަ ވެހިކަލްތައް ފުލުހުންނާ ގުޅިގެން ވަގުތުން ޓޯވ ކުރުމަށް ވިސްނަމުން އަންނަ ކަމަށް، މާލޭ ސިޓީ ކައުންސިލްގެ މޭޔަރު އާދަމް އާޒިމް މިއަދު ވިދާޅުވެއްޖެއެވެ. އަދި އެ ކައުންސިލުން ވިސްނަނީ ކަން މަތި ތަކުގައި ރަތް ރޮނގު ދެމުމަށް ކަމަށް ވެސް ހާމަކޮށްފައިވެއެވެ.

މާލޭގެ ޓްރެފިކް މައްސަލަ ހައްލުކުރަން މުއައްސަސާތަކުން ބުރާސްފަތި ދުވަހު ބޭއްވި މަޝްވަރާ ބައްދަލުވުމަށް ފަހު މީޑިއާތަކާ ވާހަކަ ދައްކަވަމުން އާޒިމް ވިދާޅުވީ،  ކަންމަތިތަކުގައި ޕާކު ކުރުމަކީ މަނާކަމެއް ނަމަވެސް، ކަންމަތިތަކުގައި އުޅަނދު ޕާކުކޮށްފައި ހުންނަ ކަމަށާއި، މަޝްވަރާ ކުރެވުނު ފިޔަވަޅަކީ ރައްޔިތުން އެކަމަށް ސަމާލުވާން އެންގުމުގެ ގޮތުން ކުރަން ނިންމާފައިވާ ކަމެއް ކަމަށެވެ.

މާލޭގައި ދުއްވާ ވެހިކަލްތައް އިންތިހާއަށް އިތުރުވެގެން ގޮސްފައިވާއިރު، ވެހިކަލްތައް ޕާކުކުރާއިރު ޕޭވްމަންޓުން ހިނގާ މީހުނަށް އެއްވެސް ވަރަކަށް ނުވިސްނާކަން މިހާރު އޮތީ ވަރަށް ބޮޑަށް ފާހަގަ ކުރެވިފައެވެ. އެގޮތުން ޕޭވްމަންޓަށް އެރޭނެ ގޮތެއް ހޯދުމަށް އުނދަގޫ އިރު، ޕޭވްމަންޓަށް އެރިއްޖެނަމަ އެ ތަނުން ފައިބާނެ ގޮތެއް ހޯދުމަށް ވެސް މިހާރު އޮންނަނީ އުނދަގޫ ކަމަކަށް ވެފައެވެ.