މިދިޔަ އަހަރުގެ އޮކްޓޯބަރު މަހު ހަމާސްއިން އިޒްރޭލަށް ދިން ހަމަލާއަކަށްފަހު، އިޒްރޭލުން އަނިޔާވެރިކަމާއެކު ފަލަސްތީނުގެ ކުށެއް ނެތް ރައްޔިތުންނާ ދެކޮޅަށް ހިންގަމުންދާ ގަތުލުއާމުގައި މިހާތަނަށް މަދުވެގެން 40،000 މީހުން ޝަހީދުކޮށްލާފައިވާކަމަށް، ފަލަސްތީނުގެ ހެލްތު މިނިސްޓްރީއިން ބުރާސްފަތި ދުވަހު ހާމަކޮށްފިއެވެ.

ޝަހީދުކޮށްލެވުނު މީހުންގެ ތެރޭގައި މަދުވެގެން 16،456 ކުޑަކުދިންނާއި 11،000 އަށް ވުރެން ގިނަ އަންހެނުން ހިމެނޭނެކަމަށް މިނިސްޓްރީއިން ބުނެފައިވެއެވެ. އެހެންކަމުން، ހަމާސް ނައްތާލުމަށްކަމަށް ބުނެ އިޒްރޭލުން ދެމުންގެންދާ ހަމަލާތަކުގައި ޝަހީދުވެފައިވާކަމަށް މިހާތަނަށް ޔަގީން ކުރެވުނު މީހުންގެ ތެރެއިން ގާތްގަނޑަކަށް %69 މީހުންނަކީ އަންހެނުންނާއި ކުޑަކުދިންނެވެ.

ޝަހީދުކޮށްލެވުނުކަމަށް މިނިސްޓްރީއަށް ޔަގީން ކުރެވިފައިވާ މި އަދަދަކީ، މީހުން ޝަހީދުކޮށްލެވުނު އަދަދަށް ވުރެން ކުޑަ އަދަދެއްކަމަށް ގިނަ ބަޔަކު ގަބޫލުކުރެއެވެ. އެއީ، މިހާތަނަށް ވީނުވީ ނޭންގި ގެއްލިފައިވާ ގާތްގަނޑަކަށް 10،000 އެއްހާ މީހުން ތިބޭނީ، ހަމަލާތަކުގައި ވެއްޓިފައިވާ އިމާރާތްތަކުގެ ދަށުގައި ތާށިވެ މަރުވެފައިކަމަށް ގަބޫލުކުރެވޭތީއެވެ.

ފަލަސްތީނުގެ ހެލްތު މިނިސްޓްރީއިން ޝަހީދުވެފައިވާ މީހުންގެ އަދަދު ހާމަކުރި އިރު، ހަނގުރާމަ ހުއްޓާލުމަށް ސުލްހައިގެ މަޝްވަރާތަކުގެ އައު ބުރެއް ޤަތަރުގެ ދޯހާގައި ބުރާސްފަތި ދުވަހު ފަށައިގެން ކުރިޔަށް އެބަދެއެވެ. އެ މަޝްވަރާތަކުގައި އިސްކޮށް ހަރަކާތްތެރިވަނީ ޤަތަރާއި، މިސްރު އަދި އެމެރިކާއިންނެވެ.

އެކުވެރި ދައުލަތުން (އދ) ހާމަކޮށްފައިވާ ގޮތުގައި، އިޒްރޭލުގެ ހަމަލާތަކުގައި ގާޒާ ސްޓްރިޕްގެ އިމާރާތްތަކުގެ ތެރެއިން ތިންބައިކުޅަ ދެބައި (2/3) ވަނީ ބޭނުން ނުކުރެވޭވަރަށް ހަލާކުވެ ނުވަތަ އެއްކޮށް ވީރާނަ ވެފައެވެ.

އދ ގެ ހައިކޮމިޝަނަރ ފޯރ ހިއުމަން ރައިޓްސް، ވޮލްކާ ޓާރކް ބުނީ، މިއަދުގެ ހާލަތަށް ފަލަސްތީނު ދިޔައީ، އިޒްރޭލުން ހަނގުރާމައިގެ ގަވާއިދާ ހިލާފުވެފައިވާތީއެވެ.

ފަލަސްތީނުގެ ރައްޔިތުންގެ ހާލަތު އިތުރަށް ނިކަމެތިވަމުން އަންނަނީ، މިހާރު ޓެންޓު ތަކުގައި ހަލުވިކަމާއެކު ފެތުރެމުން އަންނަ ނުރައްކާތެރި ބަލިތަކުގެ ސަބަބުންނެވެ. އޭގެ ތެރޭގައި ޕޯލިއޯ ވެސް ހިމެނެއެވެ.