ލޭނު މަސްވެރިކަން ކުރުމުގެ ގަވާއިދުގެ ދެލިކޮޕީއަށް ޚިޔާލު ހުށައެޅުމުގެ ފުރުޞަތު އަންނަ އާދިއްތަ ދުވަހަށް ހަމަވާތީ، އެޤަވާއިދަށް ޚިޔާލު ހުށައެޅުމަށް ބޭނުންވާ ފަރާތްތަކުން ފުރުޞަތުގެ ބޭނުން ހިފުމަށް ފިޝަރީޒް މިނިސްޓްރީ އެދިއްޖެއެވެ.

އެމިނިސްޓްރީން ލޭނު މަސްވެރިކަން ކުރުމުގެ ގަވާއިދުގެ ދެލިކޮޕީއަށް އާންމުންގެ ހިޔާލާއި ކޮމެންޓު ހޯދުމަށް 5 އޯގަސްޓް 2024 ވަނަ ދުވަހުގައެވެ.

ފިޝަރީޒް މިނިސްޓްރީން ގެންދަނީ، ލޭނުގެ މަސްވެރިކަމަށް ހުޅުވާލުމަށް ފުރުޞަތު ދިނުމަށް މަސައްކަތް ކުރަމުންނެވެ. މިގޮތުން، ލޭނުމަސްވެރިކަން ކުރުމާބެހޭ ޤަވާއިދަކީ، ދިވެހިރާއްޖޭގެ ކަނޑުމަހުގެ މަސްވެރިކަން އިތުރަށް ތަރައްޤީކުރުމުގެ މަޤްސަދުގައި ލޭނުމަސްވެރިކަން ދިވެހިރާއްޖޭގައި އަލުން ހުޅުވާލުމަށް ވަޒީރުންގެ މަޖިލީހުން ނިންމުމާ ގުޅިގެން، އެކުލަވާލައްވާފައިވާ ޤަވާއިދެކެވެ.

ރާއްޖޭގައި އިތުރު ފަރާތްތަކަށް ލޭނުގެ މަސްވެރިކަން ކުރުމަށް ހުއްދަދީ، ރާއްޖެއިން ލޭނުއަޅައިގެން މަސްބޭނުން އިތުރު ކުރުމަށް ސަރުކާރުން ނިންމާފައި ވަނީ، އިންޑިއަން އޯޝަން ޓޫނާ ކޮމިޝަން (އައި.އޯ.ޓީ.ސީ) ރާއްޖެއަށް ކަނޑައަޅާފައިވާ ކޯޓާ އާއި އެއްވަރަށް ރާއްޖެއިން މަސް ނުބާނާތީ ކުރިޔަށް އޮތް ތަނުގައި އެ ކޮމިޝަނުން ރާއްޖެއަށް ދޭ ކޯޓާގެ އަދަދު މަދުކޮށްފާނެތީ ކަމަށް ފާހަގަކޮށެވެ. ފިޝަރީޒް މިނިސްޓްރީން ހާމަކޮށްފައިވާ ގޮތުގައި، އެކޮމިޝަނުން ރާއްޖެއަށް ބޮޑުކަންނެލީގެ ކޯޓާއެއްގެ ގޮތުގައި 2000 ޓަނު އަދި، ރީނދޫ އުރަހަ ކަންނެލީގެ ކޯޓާގެ ގޮތުގައި 47000 ޓަނު ކަނޑައަޅާފައި ވާއިރު، އެ އަދަދަށް ރާއްޖެއިން ލޭނުއަޅައިގެން މަހެއް ނުބާނައެވެ. މިގޮތުން ފާއިތުވި 2 އަހަރުވެސް ރާއްޖެއިން ބާނާފައި ވަނީ 30000ޓަނުގެ ރީނދޫ އުރަހަ ކަންނެލި ކަމުގައިވެސް ފިޝަރީޒް މިނިސްޓްރީން ވިދާޅުވެފައިވެއެވެ.

ލޭނު މަސްވެރިކަމަށް މިފަހަރު ހުޅުވައިލާއިރު ފާއިތުވީ ތަނުގައި ދިވެހިރާއްޖޭގައި ލޭނު މަސްވެރިކަން ކުރިއިރު ލިބިފައި ހުރި ތަޖުރިބާއަށް ބަލައި، މި މަސްވެރިކަމަކީ ދިވެހީންނަށް ފައިދާހުރި އަދި ޤާނޫނާއި ގަވާއިދުތަކާ އެއްގޮތައް ކުރެވޭ މަސްވެރިކަމެއްކަން ކަށަވަރުކުރުމުގެ ގޮތުން ހާއްސަ މާއްދާތަކެއް މި ގަވާއިދުގައި ހިމަނާފައި ވާނެކަމުގައިވެސް ފިޝަރީޒް މިނިސްޓްރީން ވަނީ ވިދާޅުވެފައެވެ.