މިއަދު ފާހަގަކުރާ، އިންޑިއާގެ މިނިވަންކަމަށް 77 އަހަރު ފުރޭ 78ވަނަ މިނިވަން ދުވަހުގެ މުނާޞަބަތުގައި ކުރީގެ ރައީސް އިބްރާހިމް މުޙައްމަދު ޞާލިޙް އިންޑިއާގެ ރައީސަށާއި އެޤައުމުގެ ބޮޑު ވަޒީރަށާއި ރައްޔިތުންނަށް ތަޏހްނިޔާ ފޮނުއްވައިފިއެވެ.

ރައީސް ޞާލިޙް ގެ ތަޙްނިޔާގެ މެސެޖުގައި، އިންޑިއާއިން ރާއްޖެއަށް ވެދެއްވަމުން ގެންދަވާ އެއްބާރުލެއްވުމަށާއި، އިންޑިއާ ކަނޑުގެ ސަރަޙައްދުގެ ސަލާމަތާއި ރައްކާތެރިކަން ދެމެހެއްޓުމަށް ކުރައްވަމުން ގެންދަވާ މަސައްކަތްތަކަށް ޝުކުރު އަދާކުރެއްވިއެވެ. އަދި ޒަމާނުންސުރެ އިންޑިއާ އާއި ދިވެހިރާއްޖެ އާއި ދެމެދު އޮތް ގާތް ރަޙްމަތެރިކަމުގެ ގުޅުން އެގޮތުގައި ދެމިގެންދާނޭ ކަމުގައި އުއްމީދު ކުރައްވާކަމުގައި ވިދާޅުވިއެވެ.

ކުރީގެ ރައީސް އިބްރާހީމް މުޙައްމަދު ޞާލިޙްގެ ޒަޢާމަތަކީ އިންޑިއާ އާއި ދިވެހިރާއްޖޭގެ ގުޅުން އެންމެ ބޮޑަށް ބަދަހިވެގެން ދިޔަ ދައުރެވެ. އިންޑިއާ ސަރުކާރަކީ، ރާއްޖޭގެ ތަރައްޤީގައި މުހިއްމު ބައިވެރިއެކެވެ.