ދިވެހިންގެ ތެރެއިން ގިނަ ބަޔަކު އާދަވެ ދުފުމަށް ބޭނުންކުރާ ފޯކުގެ ދިޔައިގައި ހުންނަ އެއް މާއްދާއަކީ، ވޯލްޑް ހެލްތު އޯގަނައިޒޭޝަން (ޑަބްލިޔުއެޗްއޯ) އިން ކެންސަރުޖެހޭ މާއްދާތައް ކަނޑައަޅާފައިވާ ލިސްޓުގެ އެންމެ ކުރީގައި އޮންނަ މާއްދާއެއް ކަމަށް، ކެންސަރު ބައްޔަށް ހާއްސަ ޑޮކްޓަރ މުޙައްމަދު ޝިފާން ވިދާޅުވެއްޖެއެވެ. ޑރ. ޝިފާން މިހެން ވިދާޅުވީ، "ނޫން" ގެ ހާއްސަ ޕްރޮގްރާމް، "ކޮފީ ވިތު ސުލޭމާނު" ގައި ވާހަކަފުޅު ދައްކަވަމުންނެވެ.

ޑރ. ޝިފާން ވިދާޅުވީ، އެ މާއްދާއަކީ 2004 ވަނަ އަހަރުން ފެށިގެން ޑަބްލިޔުއެޗްއޯގެ ކެންސަރުޖެހޭ މާއްދާތައް ކަނޑައަޅާފައިވާ ލިސްޓުގައި ބަދަލެއްނައިސް، މިއަދާ ހަމައަށް އޮތް އެއްޗެއް ކަމަށެވެ. އެހެންކަމުން އެއީ އާދަޔަކަށް ހަދައިގެން ބޭނުންކުރާ ވަރަށް ވުރެން މާ ނުރައްކާތެރި އެއްޗެއް ކަމަށް، ޑރ. ޝިފާން ވަނީ ވިދާޅުވެފައެވެ.

މި ކަމުގައި އޮތް ހިތާމައަކީ، ފޯކަކީ ނުރައްކާތެރި އެއްޗެއްކަން އެނގިތިބެ ވެސް، ގިނަ ބަޔަކު މި ތަކެތި އިންތިހާއަށް ބޭނުން ކުރަމުން ދިއުމެވެ. އަދި ފޯކުގެ އިތުރުން، ތަފާތު ކެމިކަލްތައް ބޭނުންކޮށްގެން އުފައްދާ ސުޕާރީއަކީ ވެސް، ކެންސަރު ޖެހުމަށް މަގުފަހިވާނެ އެއްޗެއްކަމަށް ޑރ. ޝިފާން ވަނީ ވިދާޅުވެފައެވެ.

އިންސާނުންނަށް އާދަވެފައި ހުންނަ ކަންކަން ހުއްޓާލުމަކީ ފަސޭހަ ކަމެއް ނޫނެވެ. މިފަދަ ކަންކަމުގައި އެންމެ ރަގަޅު އެއް ފޮމިއުލާއަކީ، އޭގެ "ރިޕްލޭސްމެންޓެއް" ނުވަތަ ބަދަލުގައި ބޭނުން ކުރާނެ އެފަދަ އެހެން އެއްޗެއް ހޯދުމެވެ. ނަމަވެސް އެއީ ހަށިގަނޑަށް ގެއްލުންދޭ އެއްޗަކަށް ވެގެން ނުވާނެއެވެ.

ފޯއް ދުފުމުގެ އާދައަކީ ވެސް ހުއްޓާލަން އުނދަގޫ ކަމެކެވެ. އަޅުގަނޑުމެންގެ ތެރެއިން ގިނަ ބަޔަކު ތިބީ އެކަން ބޭނުންވި ނަމަވެސް، އެކަން ހުއްޓާނުލެވިފައެވެ. އެގޮތުން މި ކަމުން ސަލާމަތްވުމަށް، ބަދަލުގައި އެހެން އެއްޗެއް ބޭނުން ކުރެވިދާނެއެވެ. ފޯކުގެ ބަދަލުގައި ބޭނުން ކުރެވިދާނެ ބައެއް ތަކެއްޗަށް އަލިއަޅުވާލަމުން ޑރ. ޝިފާން ވިދާޅުވީ، ކާފޫރުތޮޅި، ފޮނިތޮށި އަދި ކަރަންފޫ ފަދަ ތަކެއްޗަކީ ދުފުން ހުއްޓާލުމަށް ބޭނުން ކުރެވިދާނެ ބައެއް ތަކެތި ކަމަށެވެ.

ފޯކެކޭ އެއްގޮތަށް، ދުންފަތުގެ އިސްތިއުމާލު ކުރުމަކީ ވެސް ހަށިގަނޑަށް ވަރަށް ބޮޑަށް ގެއްލުންވެ ކެންސަރު ޖައްސާނެ އަމަލެއްކަން ޑރ. ޝިފާން ފާހަގަ ކުރެއްވެވިއެވެ. މީގެ އިތުރުން، ކެއުމަށް ބޭނުންކުރާ ހަކުރު ގިނައިން ބޭނުން ކުރުމަކީ ވެސް ހަށިގަނޑަށް ގެއްލުން ހުރި ކަމެއް ކަމަށް ވަނީ ވިދާޅުވެފައެވެ.

އެހެންކަމުން، ކަސްރަތު ކުރުމުގެ އާދަ އަޅުގަނޑުމެންގެ ތެރޭގައި އަށަގަނެގެން އަންނަ އިރު، ހަށިގަނޑަށް ގެއްލުންދޭ ތަކެއްޗާ ދުރަށް ދިއުމުގެ އާދައަކީ ވެސް އަޅުގަނޑުމެން އަށަގަންނަން މަސައްކަތް ކުރަންޖެހޭ އާދައެކެވެ. އަދި މިފަދަ ތަކެތި ބޭނުން ކުރުން ހުއްޓާލުމަކީ އަމިއްލަ އިހުތިޔާރުގައި އޮންނަ ކަމަކަށް ވީހިނދު، މި ކަންކަމަށް ސަމާލުވުމަށް ޑރ. ޝިފާން ވަނީ ވިދާޅުވެފައެވެ. ނޫންނަމަ، އަޅުގަނޑުމެންނަށް ވިސްނޭނީ ވަގުތު ފާއިތުވާ ފަހުންނެވެ.