ނުރައްކާތެރި އެމްޕޮކްސް ފެތުރޭ މިންވަރު އިތުރުވާތީ އެފްރިކާގައި އާންމު ސިއްހަތުގެ ކުއްލި ހާލަތު އިއުލާންކޮށްފިއެވެ. އެފްރިކަން ޔޫނިއަންގެ ސިއްހީ ކަންތައްތައް ދިރާސާ ކުރާ، އެފްރިކާ ސެންޓަރސް ފޯރ ޑިސީޒް ކޮންޓްރޯލް އެންޑް ޕްރެވެންޝަން (އެފްރިކާ ސީޑީސީ) އިން ބުނީ، އާންމު ސިއްހަތުގެ ކުއްލި ހާލަތު އިއުލާންކުރީ، ބަލި ފެތުރެމުންދާ މިންވަރު އިތުރުވާތީ އެކަން ސަމާލުކަމަށް ގެނައުމަށް ކަމަށެވެ.

އެމްޕޮކްސް ފެތުރޭތީ އެކަމަށް ކަންބޮޑުވެ އެފްރިކާ ސީޑީސީގެ ވެރިޔާ، ޖީން ކަސޭޔާ ބުނީ، ކޮންގޯ އިން ފެނުނު މި ބަލި މިހާރު މުޅި އެފްރިކާ ބައްރަށް ފެތުރިފައިވާ ކަމަށެވެ.

އެފްރިކާ ސީޑީސީގެ ތަފާސް ހިސާބުތައް ދައްކާ ގޮތުން، މި ހިނގާ އޯގަސްޓް މަހުގެ 4 ވަނަ ދުވަހުގެ ނިޔަލަށް، އެމްޕޮކްސްގެ 38،465 ކޭސް ވަނީ ދެނެގަނެވިފައެވެ. އަދި އޭގެ ތެރެއިން 2022 ވަނަ އަހަރުގެ ޖެނުއަރީ މަހުގެ ފަހުން 1،456 މީހަކު ވަނީ މި ބަލީގައި މަރުވެފައެވެ.

ކަސޭޔާ އިތުރަށް ހާމަކޮށްފައިވާ ގޮތުގައި، މި ބައްޔަށް "ރިއެކްޓް" ކުރުމަށް ވުރެން، މިކަމުގެ ސަބަބުން ކުރިމަތިވެފައިވާ ހާލަތު ގޯސްވެ، މިހާރު މިއޮތީ "ޕްރޮއެކްޓިވް" ވެ، ބަލި ނައްތާލުމަށް ވަރަށް ގަދަޔަށް މަސައްކަތް ކުރަންޖެހޭ ހާލަތެއްގައެވެ.

މި ބައްޔަކީ ގައިން ގަޔަށް އަރާ ބައްޔެކެވެ. އަދި މި ބަލި ގައިން ގަޔަށް އަރަނީ ވަރަށް ކައިރިން ދިމާވެގެންނެވެ. މި ބަލި ޖެހުމުން ގައިގެ ހަންގަނޑުގައި ރޭޝް ނެގުމާ، ހުން-އައުން ފަދަ ކަންކަން ދިމާވެ، ގައިގެ އެތަން މިތާގައި ފާރު ހެދެއެވެ. މި ބަލީގެ ނުރައްކާ އެންމެ ބޮޑީ ކުޑަ ކުދިންނަށާއި، މާބަނޑު މީހުނަށާއި އަދި ދިފާއީ ނިޒާމް ބަލިކަށި މީހުނަށެވެ.

އެމްޕޮކްސް ފުރަތަމަ ފެނިފައިވަނީ ކޮންގޯއިން، 1970 ވަނަ އަހަރުއެވެ. އަދި މި ބަލި މިހާރު މުޅި އެފްރިކާއަށް ފެތުރިފައިވާއިރު، މި އަހަރުގެ މިހާތަނަށް 15،000 އަށް ވުރެން ގިނަ ކޭސް ވަނީ ރެކޯޑު ކުރެވިފައެވެ. އަދި މީގެ ތެރެއިން  461 ވަނީ މި ބަލީގައި މަރުވެފައެވެ.