އިނގިރޭސިވިލާތުގެ ލިވަރޕޫލް ފުޓްބޯޅަ ކްލަބްގެ ކެޕްޓަން ޖޯޑަން ހެންޑަސަން ސައުދީ ޕްރޯލީގުގެ އަލް އިއްތިފާގް އަށް ބަދަލުވެއްޖެއެވެ. ހަބަރުތައް ބުނާ ގޮތުން، އިނގިރޭސިވިލާތުގެ ކުރީގެ މަޝްހޫރު ފުޓްބޯޅަ ކުޅުންތެރިޔާ އަދި ލިވަރޕޫލަށް ގިނަ މެޗުތަކެއް ކުޅެދީ، ގިނަ ދުވަހު ކެޕްޓަނެއްގެ މަގާމް އަދާކޮށްފައިވާ ސްޓީވެން ޖެރާޑް ކޯޗު ކޮށްދެމުން އަންނަ މި ޓީމަށް ހެންޑަސަން ބަދަލުވީ 3 އަހަރުގެ ކޮންޓްރެކްޓެއްގައި 15.4$ މިލިއަން އަށެވެ.

އުމުރުން 33 އަހަރުގެ ހެންޑަސަންއަށް، އަލްއިއްތިފާގުން ހަފްތާއަކު 917,000$ އާއި ގާތްކުރާ މުސާރައެށް ދިނުމަށް އެއްބަސްވެފައިވެއެވެ.

ހެންޑަސަންގެ މި ބަދަލާއި ގުޅިގެން، ލިވަރޕޫލްގެ ކޯޗު ޖާގަން ކްލޮޕް ބުނެފައިވަނީ، މި ބަދަލު ވެގެން ގޮސްފައިވަނީ އޭނާއަށް ވެސް ވަރަށް އުނދަގޫ ކަމަކަށެވެ. އަދި މިއީ ހެންޑަސަންއަށް ވެސް ފަސޭހަ ނިންމުމެން ނޫން ކަމަށާއި، އޭނާ ލިވަޕޫލުން ވަކިވެ ދިޔަޔަސް، އޭނާގެ ހަނދާންތައް އަބަދުވެސް މުޅި ޓީމާއެކު ވާނެ ކަމަށް ބުންޏެވެ.

Advertisement

ހެންޑަސަން އަލްއިއްތިފާގަށް ބަދަލުވުމުގައި ޖެރާޑުގެ ވަރަށް ބޮޑު ހިއްސާއެއް ވާކަމަށް ހަބަރުތައް ބުނެއެވެ.

ހެންޑަސަންއަކީ 2011 ވަނަ އަހަރު ސަންޑަލޭންޑުން ލިވަރޕޫލަށް ބަދަލުވި ކުޅުންތެރިއެކެވެ. އަދި ލިވަރޕޫލްގެ ކެޕްޓަންގެ ގޮތުގައި އޭނާ ހަމަޖައްސާފައިވަނީ 2015 ވަނަ އަހަރު، ޖެރާޑު އެޓީމް ދޫކޮށްދިއުމުންނެވެ.