ފަލަސްތީނުގެ ބައްޕައަކު، އޭނާއަށް ލިބުނު އެއްމާބަނޑު ދެ ކުދިންގެ އުފަންދުވަހުގެ ސެޓްފިކެޓު ހެއްދުމަށް ގޮސް، އެ ތަކެތި ހިފައިގެން އައި އިރު، އެ ދެކުދިންނާއެކު، އެކުދިންގެ މަންމަ އާއި މާމަ ވެސް އިޒްރޭލުގެ ސިފައިން ޝަހީދުކޮށްލައިފިއެވެ.

މުހައްމަދު އަބޫ އަލް-ޤުމްސަންގެ މުޅި އާއިލާ ޝަހީދުކޮށްލީ އެމީހުން ދިރިއުޅެމުން ދިޔަ ސަރަހައްދަށް އިޒްރޭލުން ދިން ރޮކެޓު ހަމަލާއެއްގައެވެ.

އަބޫ އަލް-ޤުމްސަން ބުނީ، އެމީހުންގެ ގެދޮރު ގެއްލުމަށްފަހު، އަނބިމީހާ މާބަނޑުވުމުން އެ އާއިލާ ދިރިއުޅެމުން ދިޔައީ ދަޔާ އަލް-ބަލާހްގައި ހުންނަ އެޕާޓްމެންޓެއްގައި ކަމަށެވެ.

އަބޫ އަލް-ޤުމްސަންގެ އަނބިމީހާއަކީ ޑޮކްޓަރެކެވެ. އަދި އެ ދެމީހުންގެ އެއްމާބަނޑު ދެކުދިން ވިހާފައިވަނީ އޮގަސްޓު 10 ވަނަ ދުވަހުއެވެ. އެމީހުނަށް ލިބުނު ދެކުދިންގެ ތެރެއިން އެއް ކުއްޖަކީ ފިރިހެން ކުއްޖެކެވެ. އެ ކުއްޖާގެ ނަމަކީ އަސެރުއެވެ. އަދި އަނެއް ކުއްޖަކީ އަންހެން ކުއްޖެކެވެ. އެއީ އައިސެލްއެވެ. މި ދެކުދިން ދުނިޔޭގައި ތިބީ ހަތަރު ދުވަހުއެވެ.

އަސެރު އާއި އައިސެލް

މި ހަމަލާއިން އަބޫ އަލް-ޤުމްސަން ސަލާމަތްވެ އެކަނިވެރިވީ، އެވަގުތު އޭނާ ގޭގައި ނެތުމުންނެވެ.

ގާޒާގެ ހެލްތު މިނިސްޓްރީން ހާމަކުރާ ގޮތުގައި، އިޒްރޭލުން ފަލަސްތީނަށް ހަމަލާ ދޭން ފެށިތާ މިހާރު 10 މަސް ދުވަސް ހޭދަވެފައިވާއިރު، މިހާތަނަށް 16،500 އެއްހާ ފަލަސްތީނުގެ ކުޑަ ކުދިން ވަނީ ޝަހީދުވެފައެވެ.