ރާއްޖެއަށް މިހާރު ކުރަމުންދާ ވިއްސާރައާ ގުޅިގެން، 14 އޯގަސްޓު ވާ ބުދަ ދުވަހަކީ ސަރުކާރު ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުއިއްޒު ހަމަޖައްސަވައިފައިވީ ނަމަވެސް، ޕާސްޕޯޓުގެ ހިދުމަތް މެދުނުކެނޑޭނެކަމަށް މޯލްޑިވްސް އިމިގްރޭޝަނުން ބުނެފިއެވެ.

އިމިގްރޭޝަނުން ބުނީ، އެ ހިދުމަތް ފޯރުކޮށްދޭނީ އާންމު ރަސްމީ ދުވަސްތަކުގައި އެ ހިދުމަތް ފޯރުކޮށްދޭ ވަގުތު ތަކުގައި ކަމަށެވެ. އެގޮތުން ޕާސްޕޯޓަށް އެދި އިމުގާ ޕޯޓަލް މެދުވެރިކޮށް 24 ގަޑިއިރު ހުށަހެޅުން މެދުނުކެނޑޭނެ ކަމަށާއި، ޕާސްޕޯޓާ ހަވާލުވުމަށް ކިއުބީ މެދުވެރިކޮށް، ހެނދުނު 08:30 އިން ހަވީރު 05:00 އަށް ނަންބަރު ދޫކުރުން ކުރިއަށްދާނެ ކަމަށް، އިމިގްރޭޝަނުން ސޯޝަލް މީޑިއާގައި ކުރި ޕޯސްޓުގައި ވެއެވެ.

ބުދަ ދުވަހަކީ ސަރުކާރު ބަންދު ދުވަހަކަށް ރައީސުލްޖުމްހޫރިއްޔާ ހަމަޖެއްސެވީ، ރާއްޖޭގެ ވަރަށް ގިނަ ރަށްތަކަށް ބޯކޮށް ވާރޭވެހި މޫސުން ގޯސްވުމުގެ ސަބަބުން، ކިޔަވާ ކުދީންނާ ވަޒީފާ އަދާކުރާ ފަރާތްތަކަށްވެސް ދަތުރުފަތުރުކުރުމާ ހިނގާބިނގާވާން ދަތިވުމާއި ގުޅިގެން ދެއްވާ ލުޔެއްގެ ގޮތުގައި ކަމަށް، ރައީސުލްޖުމްހޫރިއްޔާގެ އޮފީހުގެ ތަރުޖަމާނު ހީނާ ވަލީދު ވަނީ ވިދާޅުވެފައެވެ.