ރާއްޖެއިން ފުރާ އެއްވެސް ދަތުރުވެރިއަކު ޓްރެވަލަރ ޑެކްލަރޭޝަން ފޯމު (އިމުގާ ފޯމު) ފުރަން ނުޖެހޭ ގޮތަށް މޯލްޑިވްސް އިމިގްރޭޝަނުން ނިންމައިފިއެވެ.

އިމިގްރޭޝަނުން ސޯޝަލް މީޑިއާގައި ކުރި ޕޯސްޓެއްގައި ބުނީ، މި މަހުގެ 15 ވަނަ ދުވަހުން ފެށިގެން، މި ނިންމުން ތަންފީޒު ކުރަން ފަށާނެއެވެ.

އިމިގްރޭޝަނުން ހާމަކޮށްފައިވާ ގޮތުގައި މިއީ ދަތުރުވެރީންގެ ތަޖުރިބާ ފަސޭހަކޯށްދިނުމުގެ ގޮތުން ގެނެވުނު ބަދަލެކެވެ.

ރާއްޖެއަށް އެތެރެވާ އަދި ރާއްޖެއިން ފުރާ ހުރިހާ ދަތުރުވެރިން އިމިގްރޭޝަނަށް ހުށަހަޅަންޖެހޭ ފޯމަކަށް މި ފޯމު ހަދާފައިވަނީ، ކޮވިޑާއި ގުޅިގެން ބޯޑަރު ބަންދު ކުރުމަށްފަހު އަލުން ހުޅުވިއިރުއެވެ. އޭރު މި ފޯމުގެ މައިގަނޑު މަގުސަދަކަށްވީ، ދަތުރުވެރީންގެ ސިއްހީ ހާލަރު ދެނެގަތުމެވެ.

ނަމަވެސް އޭގެ ފަހުން ދަތުރު ކުރުމުގައި ލުއި ދިނުމުގެ ގޮތުން، މިއީ ދިވެހިން ފުރަން ނުޖެހޭ ފޯމެއްގެ ގޮތުގައި ކަނޑައެޅިއެވެ. އަދި މިއަދު އިމިގްރޭޝަނުން އާންމު ކުރި ގޮތުން، ދެން މި ފޯމު ހުށަހަޅަންޖެހޭނީ ރާއްޖެއަށް އެތެރެވާއިރު، ހަމައެކަނި ބިދޭސީންނެވެ.