މާލެއަށް ބޯކޮށް ވާރޭ ވެހެމުން ދިއުމުގެ ސަބަބުން، މަގުތަކުގައި ފެން ބޮޑުވެ، ގޭގެއަށް ފެން ވަނުމުގް ހާދިސާތައް ހިނގަމުން ދާތީ، މަގުތަކުން ފެން ހިނދެންދެން ބަރު ވެހިކަލް މާލޭގައި ނުދުއްވުމަށް ފުލުހުން އެދިއްޖެއެވެ.

ފުލުހުން އިތުރަށް ބުނެފައިވަނީ، ޒަރޫރީ ބޭނުމަކަށް ނޫނީ ހަތަރު ފުރޮޅުލީ އުލަނދު ވެސް ނުދުއްވުމަށެވެ.

މިއަދުގެ މެންދުރު ކުރިން މާލޭ ސަރަހައްދަށް ވެހެން ފެށި ވާރޭގައި، މާލޭގެ ގިނަ ސަރަހައްދުތަކެއް މިހާރު އޮތީ ވެސް ފެނުއަޑީގައެވެ.

ރާއްޖޭގެ މޫސުމާ ބެހޭ އިދާރާ، މެޓް އޮފީހުން މިއަދު ނެރުނު ނޫސްބަޔާނެއްގައި ބުނީ، މިދިޔަ ތިން ދުވަހު ރާއްޖޭގެ ބޮޑު ބަޔަކަށް ބޯކޮށް ވާރޭވެހި، ވައިގަދަވެފައިވާ ކަމަށެވެ. އަދި އިއްޔެ އެންމެ ބޯކޮށް ވާރޭވެހުނު ކަމަށް ރެކޯޑް ކުރެވިފައި ވަނީ ހއ. ކެލާގެ އޮޓޮމެޓިކް ވެދާ ސްޓޭޝަނަށް ކަމަށް ވެސް އެ އިދާރާއިން ބުންޏެވެ.

މެޓް އޮފީހުން ބުނީ ކުރިއަށް އޮތް ފަސް ދުވަހު ވެސް ރާއްޖޭގެ ބޮޑު ބަޔަކަށް ވިއްސާކޮށް، ވަރަށް ވައިގަދަވާނެ ކަމަށް ލަފާކުރެވޭ ކަމަށެވެ.

ރާއްޖޭގެ ހުރިހާ ސަރަހައްދެއްގެ ކަނޑުތައް ވެސް ގަދަވެ، ވިލާގަނޑުގައި ވަރަށް ގަދަވާނެ ކަމަށް ލަފާކުރެވޭ ކަމަށް މެޓް އޮފީހުން އިތުރަށް ހާމަކޮށްފައިވެއެވެ.