ރ އަތޮޅު އިނގުރައިދޫ ޕޮލިސް ސްޓޭޝަނާއި ޕޮލިސް އިންޓެލިޖެންސް ގުޅިގެން ހިންގި އޮޕަރޭޝަނެއްގައި ހަތް މީހަކު ހައްޔަރުކޮށްފިއެވެ.

ފުލުހުން ހާމަކޮށްފައިވާ ގޮތުގައި އިނގުރައިދޫއިން ހައްޔަރުކޮށްފައިވަނީ ދިވެހި ތިން ފިރިހެނުންނާއި ބިދޭސި ހަތަރު ފިރިހެނުންނެވެ. އަދި ހައްޔަރު ކުރެވުނު ހުރިހާ ބިދޭސީން ނިސްބަތްވަނީ ބަނގުލަދޭޝްއަށް ކަމަށް ވެސް ފުލުހުން ވަނީ ހާމަކޮށްފައެވެ.

މި އޮޕަރޭޝަނުގައި އެމީހުން ހައްޔަރުކޮށް, ކޯޓު އަމުރެއްގެ ދަށުން ވަނީ އެމީހުން ދިރިއުޅެމުންދިޔަ ތަން ބަލައިފާސްކޮށްފައެވެ. އަދި އެތަނުން މަސްތުވާތަކެތިކަމަށް ބެލެވޭ ތަކެތި ފެނިފައިވާކަމަށް ފުލުހުން ހާމަކޮށްފައި ވެއެވެ. އެ ތަކެތީގެ ވަގުތީ ބަރުދަނުގައި 7.38 ގުރާމު ހުރިކަމަށް ހާމަކޮށްފައި ވެއެވެ.

މި މަހުގެ 10 ވަނަ ދުވަހު ހިންގި މި އޮޕަރޭޝަނުގައި ފުލުހުންގެ ބެލުމުގެ ދަށަށް ގެންދިޔަ އެންމެންގެ ބަންދާމެދު ގޮތެއް ނިންމުމަށް އިނގުރައިދޫ މެޖިސްޓްރޭޓް ކޯޓަށް ހާޒިރު ކުރުމުން، ތިން ދިވެހިން 15 ދުވަހަށް އަދި ހަތަރު ބިދޭސީން 10 ދުވަހަށް ބަންދުކުރުމަށް ކޯޓުން އަމުރުކޮށްފައިވެއެވެ.

ފުލުހުން އިތުރަށް ހާމަކުރީ، މި މައްސަލަ މިހާރު އިނގުރައިދޫ ޕޮލިސް ސްޓޭޝަނުން ބަލަމުންދާކަމަށެވެ.