މިއަދުގެ މެންދުރު ކުރިން މާލޭ ސަރަހައްދަށް ވެހެން ފެށި ވާރޭގައި، މާލޭގެ ގިނަ ސަރަހައްދުތަކެއް ފެނު އަޑިއަށް ހިނގައްޖެއެވެ. މި ކޮޅި ގަނޑުގައި، ބޯކޮށް ވާރޭ ވެހެމުން ދާއިރު، ގަދަ ވައި ވެސް އަންނަނީ ޖެހެމުންނެވެ.

އެގޮތުން ގިނަ ހިސާބުތަކުގެ މަގުތަކުގައި ދޮޅު ފޫޓަށް ފެން ހުރި އިރު، ޕޭމަންޓު މަތީގައި ވެސް މިހާރު ވަނީ ފެން ބޮޑުވެފައެވެ.

މިހާރު ކުރަމުންދާ ވިއްސާރައިގައި މާލޭގެ އިތުރުން ރާއްޖޭގެ އެކި ރަށްރަށުގައި ވަނީ ފެންބޮޑުވެފައެވެ.

ރާއްޖޭގެ މޫސުމާ ބެހޭ އިދާރާ، މެޓް އޮފީހުން މިއަދު ނެރުނު ނޫސްބަޔާނެއްގައި ބުނީ، މިދިޔަ ތިން ދުވަހު ރާއްޖޭގެ ބޮޑު ބަޔަކަށް ބޯކޮށް ވާރޭވެހި، ވައިގަދަވެފައިވާ ކަމަށެވެ. އަދި އިއްޔެ އެންމެ ބޯކޮށް ވާރޭވެހުނު ކަމަށް ރެކޯޑް ކުރެވިފައި ވަނީ ހއ. ކެލާގެ އޮޓޮމެޓިކް ވެދާ ސްޓޭޝަނަށް ކަމަށް ވެސް އެ އިދާރާއިން ބުންޏެވެ.

މެޓް އޮފީހުން ބުނީ ކުރިއަށް އޮތް ފަސް ދުވަހު ވެސް ރާއްޖޭގެ ބޮޑު ބަޔަކަށް ވިއްސާކޮށް، ވަރަށް ވައިގަދަވާނެ ކަމަށް ލަފާކުރެވޭ ކަމަށެވެ.

ރާއްޖޭގެ ހުރިހާ ސަރަހައްދެއްގެ ކަނޑުތައް ވެސް ގަދަވެ، ވިލާގަނޑުގައި ވަރަށް ގަދަވާނެ ކަމަށް ލަފާކުރެވޭ ކަމަށް މެޓް އޮފީހުން އިތުރަށް ހާމަކޮށްފައިވެއެވެ.