މިއަހަރު ބޭއްވި، އައި.ޖީ.ސީ.އެސް.އީ އަދި އެސް.އެސް.ސީ އިމްތިޙާނުގެ ނަތީޖާ މިއަދު މެންދުރު 12:00 އިން ފެށިގެން ދޫކުރަން ފަށާނެ ކަމުގައި މިނިސްޓްރީ އޮފް އެޑިޔުކޭޝަނުން ހާމަކުރައްވައިފިއެވެ.

ޑިޕާޓްމެންޓް އޮފް ޕަބްލިކް އެގްޒެމިނޭޝަނުން ވިދާޅުވީ، އެހެން އަހަރު ތަކެކޭވެސް އެއްފަދައިން މިއަހަރުވެސް ދަރިވަރުންނަށް ސެންޓަރުތަކުން ނަތީޖާ ދޫކުރަމުންދާނެ ކަމަށާއި، ސެންޓަރތަކުން ކެނޑިޑޭޓުންނަށް ނަތީޖާ ދޫކުރާނީ މިއަދުގެ 12.00 އިން ފެށިގެން ކަމަށެވެ.

އައި.ޖީ.ސީ.އެސް.އީ އަދި އެސް.އެސް.ސީ އިމްތިޙާނުގެ ނަތީޖާ މިއަދު ދޫކުރަން ފަށާއިރު، އޭލެވެލްއަށް ކިޔަވަން ފެށުމުގެ ފުރުޞަތު ހުރިހާ ދަރިވަރުންނަށްވެސް ދިނުމުގެ ވިސްނުން ގެންގުޅޭ ކަމުގައި އެޑިޔުކޭޝަން މިނިސްޓަރު ވަނީ ވިދާޅުވެފައެވެ.

އެޑިޔުކޭޝަން މިނިސްޓްރީން ވިދާޅުވީ، ސީ.އެޗް.އެސް.އީ މާލެ އަދި ސީ.އެޗް.އެސް.އީ ހުޅުމާލެ އަށް ދަރިވަރުން ވެއްދުމަށް އެޕްލިކޭޝަން ފޯމް ހުށަހެޅުމަށްވެސް މިއަދުންފެށިގެން ފުރުޞަތު ހުޅުވާލާފައި ވާކަމަށެވެ. މިގޮތުން އޮންލައިން އެޕްލިކޭޝަން ފޯމްގެ ލިންކު މިނިސްޓްރީގެ ވެބްސައިޓުން މިހާރު ލިބެން ހުންނާނެ ކަމުގައި އެމިނިސްޓްރީން ވިދާޅުވެފައިވެއެވެ.