ފްރާންސްގެ ޕެރިހުގައި ކުރިޔަށް ދިޔަ އޮލިމްޕިކްސް ގޭމްސްގެ އެއްވަނަ އެމެރިކާއިން ހޯދައިފިއެވެ.

ޕެރިސް 2024 އޮލިމްޕިކްސް އާދީއްތަ ދުވަހު ނިމުމަކަށް އައިއިރު، މެޑަލް ޓޭބަލްގެ އެއްވަނައަށް ވާދަކުރީ ޗައިނާ އާއި އެމެރިކާއެވެ. މި ދެ ގައުމަށް ވެސް ލިބިފައި އޮތީ 40 ރަން މެޑަލްއެވެ. ނަމަވެސް މެޑަލް ޓޭބަލްގެ ރޭންކިންގ އަށް ފަރަގު ގެނައީ، އެމެރިކާއިން ޗައިނާއަށް ވުރެން ގިނައިން ރިހި މެޑަލް ހޯދާފައިވާތީއެވެ.

އެމެރިކާއަށް ޗައިނާއާ އެއްވަރަށް ރަން މެޑަލް ކަށަވަރު ކުރެވުނީ، އަންހެނުންގެ ބާސްކެޓުބޯޅަ ގޭމްސްއިންނެވެ. އަންހެނުންގެ ބާސްކެޓު ބޯޅަ ފައިނަލުގައި ފްރާންސްއާ ދެކޮޅަށް ކުޅުނު މެޗު އެމެރިކާއިން ކާމިޔާބުކުރީ ހަނި ތަފާތަކުން، 66-67 ޕޮއިންޓުންނެވެ. މިއީ އެމެރިކާއިން އޮލިމްޕިކްސްގެ އަންހެން ބާސްކެޓު ބޯޅަ ގޭމްސް ޖެހިޖެހިގެން ކާމިޔާބުކުރި 8 ވަނަ ފަހަރެވެ.

މި ފަހަރަކީ ގައުމުން ބޭރުގައި ޗައިނާއިން އެންމެ ގިނަ މެޑަލް ކާމިޔާބު ކުރި ފަހަރެވެ. އަމިއްލަ ގައުމުގައި ބޭއްވި އެލިމްޕިކްސްގައި ޗައިނާ އިން 100 މެޑަލް ހޯދާފައިވާއިރު، ޕެރިހުގައި އެ ގައުމުން ވަނީ 91 މެޑަލް ކާމިޔާބު ކޮށްފައެވެ.

އޮލިމްޕިކްސްގެ މެޑެލް ތާވަލް، ގަދަ ފަހެއް:

1-    އެމެރިކާ: ރަން 40، ރިހި 44، ލޯ 42، ޖުމްލަ 126

2-    ޗައިނާ: ރަން 40، ރިހި 27، ލޯ 24، ޖުމްލަ 91

3-    ޖަޕާން: ރަން 20، ރިހި 12، ލޯ 13، ޖުމްލަ 45

4-    އޮސްޓްރޭލިޔާ: ރަން 18، ރިހި 19، ލޯ 16، ޖުމްލަ 53

5-    ފްރާންސް: ރަން 16، ރިހި 26، ލޯ 22، ޖުމްލަ 64