ސަރުކާރުގެ މަޤާމެއްގައި ހުރެ ޖުޑީޝަރީއަށް ނުފޫޒު ފޯރުވާ މީހަކު ހުރިނަމަ އެމީހަކު ވަގުތުން މަޤާމުން ވަކިކުރައްވާނެ ކަމުގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މާލޭ ސިޓީ ކައުންސިލަށް ކުރެއްވި ޒިޔާރަތަށްފަހުގައި، އޮންލައިން ނޫސް އަދަދުން ކުރި ސުވާލުތަކަކަށް ޖަވާބު ދެއްވަމުންނެވެ.

ރައީސް ޔާމީނުގެ ޝަރީއަތަށް މިސަރުކާރުން ނުފޫޒު ފޯރުވާފައިވާ ކަމަށް ރައީސް ޔާމީނު ގެންދަވަނީ ވިދާޅުވަމުންނެވެ. އަދި އެކަމާއި ގުޅޭ ގޮތުން ދާދިފަހުން ރައްޔިތުންގެ މަޖިލީހުގެ ރައީސް ޢަބުދުއްރަހީމް ދައްކަވާފައިވާ ވާހަކަފުޅުތަކަށްވެސް ރައީސް ޔާމީނު ރައްދު ދެއްވާފައިވެއެވެ. މީގެ އިތުރުން އެމަނިކުފާނު ވަނީ، ސަރުކާރުގެ ބައެއް މަޤާމުތަކުގައި ބޭފުޅުން ޝަރުޢީ ދާއިރާގެ ބައެއް ބޭފުޅުންނާއި ދައްކަވާފައިވާ ވާހަކަފުޅުތަކެއްގެ ރެކޯޑިންގ ހުރިކަމުގައިވެސް ވިދާޅުވެފައެވެ.

ސަރުކާރަށް ރައީސް ޔާމީނު ކުރައްވާފައިވާ ތުހުމަތުތަކާއި ގުޅޭ ގޮތުން ސުވާލުދެންނެވުމުން، ރައީސް ޑރ. މުޙައްމަދު މުޢިއްޒު ވިދާޅުވީ، އެމަނިކުފާނުގެ މެނިފެސްޓޯގައި ހިމަނާފައިވާ ގޮތަށް ޝަރުޢީދާއިރާއަށް މިސަރުކާރުން އެއްވެސް ނުފޫޒެއް ނުފޯރުވާނެ ކަމަށެވެ. އަދި އެފަދަ ކަމެއް ކުރައްވާ ބޭފުޅަކު ސަރުކާރުގެ މަޤާމެއްގައި ހުރެެއްޖެނަމަ ވަގުތުން މަޤާމުން ވަކިކުރައްވާނެ ކަމުގައިވެސް ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމަށް ވަޑައިގެންނެވީ، ރައީސް ޔާމީނުގެ ސަޕޯޓަރުންގެ ތާއީދާއި މަދަދާއި އެކުގައި، އެމަނިކުފާނު ރައީސް ޔާމީން މިނިވަންކޮށްދެއްވާނެ ކަމުގައި ވެވަޑައިގެންނެވި ވަޢުދާއި އެކުގައެވެ. މިސަރުކާރަށް 10 މަސް ފުރެންދާއިރު، އަދިވެސް ރައީސް ޔާމީނު މިނިވަންވެފައި ނުވާތީ، އެކަމާއި ގުޅުވައި، ރައީސް ޔާމީނާއި އެމަނިކުފާނަށް ތާއީދުކުރާ ފަރާތްތަކުން ގެންދަނީ، ރައީސް ޑރ. މުޙައްމަދު މުޢިއްޒަށާއި ސަރުކާރަށް ތުހުމަތުތައް ކުރަމުންނެވެ.

ރައީސް ޔާމީން ބަންދު ލުއިކޮށް ގޭބަންދަށް ބަދަލުކުރެއްވީ، ރައީސް އިބްރާހީމް މުޙައްމަދު ޞާލިޙް އެމަނިކުފާނުގެ ވެރިކަމުގެ އެންމެ ފަހު ދުވަސްކޮޅުގައެވެ.