އިންޑިއާގެ ޚާރިޖީ ވަޒީރު ޑރ. އެސް ޖަޔަޝަންކަރު، އެމަނިކުފާނު ދިވެހިރާއްޖެއަށް ކުރެއްވި 3 ދުވަހުގެ ރަސްމީ ދަތުރުފުޅު ނިންމަވާލެއްވުމަށްފަހު މިއަދު މެންދުރުފަހު މާލެއިން ފުރާވަޑައިގެންފިއެވެ.

ރަސްމީ ދަތުރުފުޅުގައި އެމަނިކުފާނު ރާއްޖެއަށް ވަޑައިގެންނެވީ، މިދިޔަ ހުކުރު ދުވަހުގައެވެ. 

އިންޑިއާގެ ޚާރިޖީ ވަޒީރު ޑރ. އެސް ޖަޔަޝަންކަރުގެ މިދަތުރުފުޅުގައި ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި ބައްދަލުކުރައްވާފައެވެ. މީގެ އިތުރުން ޚާރިޖީ ވަޒީރު މޫސާ ޒަމީރާއިވެސް ބައްދަލު ކުރައްވައި ދެޤައުމުގެ ގުޅުން ބަދަހި ކުރެއްވުމާއި ގުޅޭ ގޮތުން މަޝްވަރާކުރެއްވިއެވެ. މީގެ އިތުރުން އެމަނިކުފާނު ވަނީ، އިންޑިއާ ސަރުކާރުގެ އެހީގައި ރާއްޖޭގައި ހިންގާފައިވާ މަޝްރޫޢުތަކުގެ ނިމުން ފާހަގަކުރުމުގެ ރަސްމިއްޔާތުތަކުގައި ބައިވެރިވެވަޑައިގެންފައެވެ.

މީގެ އިތުރުން އިންޑިއާގެ އެހީގައި ރާއްޖޭގައި ހިންގާ ޢުމްރާނީ ތަރައްޤީގެ އެންމެ ބޮޑު މަޝްރޫޢު، ގްރޭޓާމާލެ ކަނެކްޓިވިޓީ ބުރިޖުގެ މަސައްކަތް ހިނގަމުންދާގޮތްވެސް އެމަނިކުފާނު ވަނީ ބައްލަވާލައްވާފައެވެ.

އިންޑިއާގެ ޚާރިޖީ ވަޒީރުގެ މިދަތުރުފުޅުގައި އައްޑޫ ސިޓީއަށް ވަޑައިގެން އައްޑޫ ސިޓީގައި އިންޑިއާ ސަރުކާރުގެ އެހީގައި ހިންގާފައިވާ ބައެއް މަޝްރޫޢުތަކުގެ ނިމުން ފާހަގަކުރުމުގެ ރަސްމިއްޔާތުގައި ބައިވެރިވެވަޑައިގެންނެވުމުގެ އިތުރުން އައްޑޫ ސިޓީގައި މަޝްރޫޢުތައް ކުރިޔަށްދާގޮތްވެސް ބައްލަވާލެއްވިއެވެ.