އިންޑިއާ ސަރުކާރުގެ އެހީގައި ކުރީ ސަރުކާރުން ރާއްޖޭގައި ފަށާފައިވާ މަޝްރޫޢުތަކާއި އައު މަޝްރޫއުތައް ކުރިޔަށް ގެންދަން ބޭނުންފުޅުވާ ކަމުގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު އިންޑިއާގެ އެކްސްޓަރނަލް އެފެއާޒް މިނިސްޓަރ ޑރ އެސް ޖައިޝަންކަރަށް ދަންނަވައިފިއެވެ.

އެކްސްޓަރނަލް އެފެއާޒް މިނިސްޓަރ ޑރ އެސް ޖައިޝަންކަރު ރާއްޖެއަށް ކުރައްވަމުން ގެންދަވާ ރަސްމީ ދަތުރުފުޅުގައި އިއްޔެ ވަނީ، ރައީސުލްޖުމްހޫރިއްޔާގެ އޮފީހުގައި، ރައީސުލްޖުމްހޫރިއްޔާ ޑރ. މުހައްމަދު މުޢިއްޒާއި ބައްދަލުކުރައްވާފައެވެ. 

މިބައްދަލުކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި ވަނީ، މިހާރު ހިނގަމުންދާ މަޝްރޫޢުތައް ކުރިއަށްގެންދިއުމާއި، ކުރިއަށް އޮތްތަނުގައި ގުޅުން ބަދަހިކުރެވިދާނެ އެކިއެކި ދާއިރާތަކާ ބެހޭގޮތުން މަޝްވަރާކުރައްވާފައި ކަމުގައި ރައީސުލްޖުމްހޫރިއްޔާގެ އޮފީހުން ވިދާޅުވެފައިވެއެވެ.

އިންޑިއާއި ދެކޮޅު ހަރަކާތްތަކުގެ ތެރެއިން މިސަރުކާރު ވެރިކަމަށް އައި ނަމަވެސް، އިންޑިއާ އާއި ދިވެހިރާއްޖެއާ ދެމެދުގައި އޮތް ގާތް އަދި ތާރީޚީ ގުޅުމުގެ މައްޗަށް އަލިއަޅުއްވާލައްވައި، މި ގުޅުން އިތުރަށް ބަދަހިކުރެއްވުމަށް މި ސަރުކާރުން މަސައްކަތްކުރައްވާނެކަމުގެ ޔަޤީންކަން ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު އިންޑިއާގެ އެކްސްޓަރނަލް އެފެއާޒް މިނިސްޓަރ ޑރ އެސް ޖައިޝަންކަރަށް އަރުވާފައިވާ ކަމުގައިވެސް އެއޮފީހުން ހާމަކުރައްވާފައިވެއެވެ.

އިންޑިއާގެ އެކްސްޓަރނަލް އެފެއާޒް މިނިސްޓަރ ޑރ އެސް ޖައިޝަންކަރު ރާއްޖެއަށް ކުރެއްވި، ރަސްމީ ދަތުރުފުޅު ނިންމަވާލެއްވުމަށްފަހުގައި، މިއަދު ރާއްޖެއިން ފުރާވަޑައިގަންނަވާނެއެވެ.