ފަލަސްތީނުގައި އިޒްރޭލުން ހިންގަމުންދާ ގަތުލު އާންމުތަކުގެ އަނިޔާވެރިކަން އިތުރުވަމުންދަނިކޮށް، ހަނގުރާމަމަތީ ސާމާނު ގަތުމަށް އެމެރިކާއިން އިޒްރޭލަށް އިތުރު 3.5 ބިލިއަން ޑޮލަރުގެ އެހީއެއް ދޭން ނިންމައިފިއެވެ. މި ކަމުގައި އެމެރިކާއިން ޝަރުތު ކޮށްފައިވަނީ، އެމެރިކާއިން އުފައްދާ ހަތިޔާރު ގަތުމަށްކަމަށް ވެސް އެ ގައުމުގެ ސްޓޭޓް ޑިޕާޓްމެންޓުން ހާމަކޮށްފައިވެއެވެ.

ސްޓޭޓު ޑިޕާޓްމަންޓުގެ ތަރުޖަމާނު އިތުރަށް ބުނެފައިވަނީ، ހަނގުރާމަ މަތީ ސާމާނު ގަތުމަށް ބައިޑެންގެ ސަރުކާރުން އިޒްރޭލަށް ދޭ އެހީގެ ތަފްސީލު މިހާރު ވާނީ ކޮންގްރެސްއާ ވެސް ހިއްސާކޮށްފައި ކަމަށެވެ.

އެމެރިކާއިން އިޒްރޭލަށް ދިނުމަށް މި ނިންމި އެހީއަކީ، އެ ގައުމުން ކޮންމެ އަހަރަކު އިޒްރޭލުގެ މިލިޓަރީއަށް ދެމުން އަންނަ 3 ބިލިއަން ޑޮލަރުގެ އިތުރުން، އެޕްރީލް މަހު އެ ގައުމުގެ ކޮންގްރެސްއިން އިސްރޭލަށް ދިނުމަށް ފާސްކުރި 14.5 ބިލިއަން ޑޮލަރުގެ މިލިޓަރީ އެހީގެ ތެރެއިން ބައެއްކަމަށް، އެމެރިކާގެ މީޑިއާއަކުން ރިޕޯޓުކޮށްފައިވެއެވެ.

އެމެރިކާއިން އިތުރަށް މި ހަމަޖައްސާ ފައިސާގެ އެއްބައި ހަރަދު ކުރުމަށް ނިންމާފައިވަނީ، ފަލަސްތީނުގެ ވެސްޓު ބޭންކުގައި ލާއިންސާނީ އަމަލުތަކެއް ހިންގާފައިވާކަމަށް ތުހުމަތު ކުރެވޭ އިޒްރޭލުގެ މިލިޓަރީ ޔުނިޓަކަށެވެ. މިކަމާ ގުޅިގެން އިޒްރޭލުގެ ސިފައިންގެ އެ ޔުނިޓަށް ފަންޑު ނުދިނުމަށް އެމެރިކާއިން ކުރިން ނިންމި ނަމަވެސް، ސްޓޭޓު ޑިޕާންޓްމަންޓުން ބުނީ މިހާރު އެ ނިންމުން ބަދަލުކޮށްފައިވާ ކަމަށެވެ. އެއީ އެ މިލިޓަރީ ޔުނިޓުން ހިންގި އަމަލުތައް ހުއްޓުވުމަށް އިޒްރޭލުން ކުރަމުންދާ މަސައްކަތަށް ހިތްވަރު ދިނުމުގެ ގޮތުންކަމަށް ވެސް ބުނެފައިވެއެވެ.