އަލް-ތާބީން ސްކޫލަކަށް ބޮން އަޅާ 100 ށް ވުރެ ގިނަ ފަލަސްތީން މީހުން ޝަހީދު ކޮށްލިތާ އެއް ދުވަސް ނުވަނީސް، ދެކުނު ގާޒާގައި ދިރިއުޅޭ ފަލަސްތީން މީހުން އެ ސަރަހައްދުން ފައިބަން އިޒްރޭލް ސިފައިން އަމުރު ކޮށްފިއެވެ.

އަލް-ތާބީން ސުކޫލަކީ ގާޒާ ސިޓީގެ ގެދޮރުގެއްލިފައިވާ ފަލަސްތީނު މީހުން ވަގުތީ ހިޔަލެއްގެ ގޮތުގައި ބޭނުން ކުރަމުން ދިޔަ ތަނެކެވެ. އަދި އެތަނަށް ބޮން އަޅާފައިވަނީ ގިނަ ބަޔަކު ފަތިސް ނަމާދަށް ތިބި ވަގުތުގައެވެ. މި ހަމަލާގައި ސްކޫލުގެ ތެރޭގައި ހުރި މިސްކިތަށް ހާއްސަކޮށް ޓާގެޓު ކޮށްފައިވާ ކަމަށް ރިޕޯޓުތައް ބުނެއެވެ.

މި ހަމަލާއަށްފަހު އިޒްރޭލުން ބުނީ، އެ ސުކޫލަކީ ހަމާސްއިން ކޮންޓްރޯލް ސެންޓަރެއްގެ ގޮތުގައި ބޭނުން ކުރަމުން ދިޔަ ތަނެއް ކަމަށެވެ. ނަމަވެސް މިކަމަށް ރައްދު ދެމުން ހަމާސް އިން ބުނެފައިވަނީ، އެ އިމާރާތުގައި އެއްވެސް ހަނގުރާމަވެރިއެއް ނޫޅޭ ކަމަށާއި އަދި އެއީ ފަލަސްތީނުގެ މައުސޫމް ރައްޔިތުން މެރުމަށް އިޒްރޭލުން ދައްކާ ބަހަނާ އެއް ކަމަށެވެ.

އަނިޔާވެރި އިޒްރޭލުން މިހާތަނަށް ދީފައިވާ ހަމަލާތަކުގައި 39،000 އަށް ވުރެން ގިނަ ކުށެއް ނެތް ފަލަސްތީނު މީހުން ވަނީ ޝަހީދުވެފައެވެ. އަދި މި ހަމަލާތަކުގައި އަނިޔާވެފައިވާ މީހުންގެ އަދަދު 92،000 އަށް ވުރެން ގިނައެވެ.