ފައިސާ އާއި މާލީ މަންފާތައް ހޯދައިގެން، މާފުށީ ޖަލަށް މަސްތުވާތަކެއްޗާއި ފޯނާއި އެނޫންވެސް ތަކެތި ވައްދައި ޤާނޫނާއި ޚިލާފު ޢަމަލުތައް ކުރަމުންދާ ކަމުގެ ތުހުމަތުގައި ފުލުހުން ހައްޔަރުކުރި، މޯލްޑިވްްސް ކަރެކްޝަނަލް ސަރވިސްގެ 13 އޮފިސަރުންގެ މައްޗައް ދައުވާކޮށްދިނުމަށް އެދި ފުލުހުންގެ އިދާރާއިން އެމައްސަލަ ޕްރޮސެކިއުޓަރ ޖެނެރަލްގެ އޮފީހަށް ފޮނުވައިފިއެވެ.

ފުލުހުން މާފުށީ ޖަލުގަޔާއި އަދި ބައެއް ރަށްރަށުގައި ހިންގި އޮޕަރޭޝަންތަކުގައި ޖުމުލަ، 13 އޮފިސަރަކު ހައްޔަރުކުރި އިރު އޭގެ ތެރެއިން 11 އޮފިސަރަކު ތިބީ ޝަރީޢަތް ނިމެންދެން ބަންދުކޮށްފައެވެ. 

އެމައްސަލައިގައި 18 އޮފިސަރުންގެ މައްޗަށް ތުހުމަތު ކުރެވުނު ނަމަވެސް އެމައްސަލައިގައި ފުލުހުން މިހާތަނަށް ހައްޔަރުކުރީ 13 މީހުންނެވެ. އެމީހުން ގެ ތެރެއިން ގިނަ ބަޔަކު ހައްޔަރުކުރީ، މިއަހަރުގެ ޖޫންމަހުގެ 27 ވަނަ ދުވަހު މާފުށީ ޖަލުގައި ހިންގި އޮޕަރޭޝަނެއްގައެވެ.

ޖަލަށް މަސްތުވާތަކެއްޗާއި ފޯނާއި އެނޫންވެސް މަނާތަކެތި ވައްދާކަމަށް ތުހުމަތު ކުރެވިގެން ހައްޔަރު ކުރެވުނު މީހުންގެ އެކައުންޓްތަކަށް ފާއިތުވި ދޮޅުއަހަރުގެ ތެރޭގައި، 73 މިލިޔަން ރުފިޔާ ޖަމާކޮށްފައިވާ ކަމުގައި އެކަމާއި ގުޅޭ ގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި، އެސިސްޓެންޓް ކޮމިޝަނަރު އޮފް ޕޮލިސް އަބްދުﷲ ޝަރީފް ވިދާޅުވިއެވެ.

ހައްޔަރުކޮށް ދަޢުވާކުރަން ފޮނުވި އޮފިސަރުން؛

1.      މާޒިން ހަމީދު، 22، ފ. ނިލަންދޫ، ހަވޭލި

2.      ޖިނާހް އަބްދުލްރަހީމް، 29، ރ. އުނގޫފާރު، އައިވަރީ ހައުސް

3.      މުހައްމަދު ފަތޫހް ފަތުހުﷲ 24، ގއ. ވިލިނގިލި، ކުއްޅަވައްގެ

4.      އަލީ ހާޝިމް، 33، ކ. މާފުށި، ބީޗު ހައުސް

5.      މުހައްމަދު ނަބުހާން، 30، ކ. މާލެ، އީވްނިންގ ސްޓަރ

6.      މުހައްމަދު ނަބީލް އިބްރާހިމް، 21، ކ. މާލެ، މ. ވޭދާ

7.      އަލީ ނާޒިމް، 36، ހދ. ނޭކުރެންދޫ، ތަރާނާގެ

8.      ޒަޔާން އަހުމަދު، 23، ކ. މާފުށި، މާވިނަ

9.      ޔާމީން ހުސެއިން، 23، ރ. މީދޫ، ހިޖާޒް

10.  އަހުމަދު ޝަމާލް، 24، ށ. ފޯކައިދޫ، ފަހާގެ

11.  މުހައްމަދު ރިމާޒް، 29، ށ. ފޯކައިދޫ، ދަނބުމާގެ

12.  އަހުމަދު އަނޫފް، 27، ކ. ކާށިދޫ، ބިންމަތީގެ

13.  އަލީ އަޝްފާގު، 32، ނ. ލަންދޫ، ކާމިނީގެ

ފުލުހުން ތަޙްޤީޤުކުރާ މައްސަލަތަކުގައި، މީހުންގެ ނަމާއި ވަނަވަރު ހާމަކުރަން ފަށާފައިވަނީ މި މަހުންފެށިގެންނެވެ. އެހެން ނަމަވެސް އެކަމުގައި ފުލުހުން ޢަމަލުކުރާ އުސޫލަކީ ކޮބައިކަން ފުލުހުން ހާމަކޮށްފައެއް ނުވެއެވެ.