ބާސެލޯނާގެ ލަ މާސިއާ އެކަޑަމީއިން ފުޓުބޯޅަ ކުޅުމުގެ ތެރެއަށް ވަތް ޑެނީ އޮލްމޯ ބާސެލޯނާއާށް ކުޅުމަށް ދެކެމުން އައި ހުވަފެން އެންމެ ފަހުން ހަގީގަތަކަށް ހަދައި، 6 އަހަރުގެ ކޮންޓްރެކްޓެއްގައި އެ ޓީމަށް ސޮއިކޮށްފިއެވެ.

މީގެ 10 އަހަރު ކުރިން ބާސެލޯނާ ދޫކޮށް ދިއުމަށް އޮލްމޯ ނިންމީ، އޭނާއަށް ބާސެލޯނާގެ ސީނިއަރ ޓީމަށް ކުޅެވޭނެކަމުގެ ފުރުސަތު ހަނިކަމަށް ދެކެވުމުންނެވެ. އެގޮތުން، "ޓީނޭޖާރ" އެއްގެ ގޮތުގައި އޭނާ ދިޔައީ ކްރޮއޭޝިއާގެ ޑައިނަމޯ ޒަގްރެބް އަށެވެ. އެއަށްފަހު ޖަރުމަނުގެ ލެޕްޒިގްއަށް ބަދަލުވުމަށްފަހު، އޭނާ މިހާތަނަށް ކުޅެމުން އައީ އެ ޓީމަށެވެ.

އޮލްމޯ ބާސެލޯނާއަށް ކުޅުމަށް ބޭނުންވެ، އެކަމަށް ދެކެމުން އައި ހުވަފެން ހަގީގަތަށް މިވީ، ނިމިދިޔަ ޔޫރޯގައި އޭނާގެ ހުނަރަށް މުޅި ދުނިޔެ ހެކިވުމަށްފަހުއެވެ. އެ މުބާރާތުގައި ސްޕެއިން އިން ހޯދި ކާމިޔާބީގައި އޮލްމޯ ވަނީ މުހިންމު ދައުރެއް އަދާކޮށް، މުހިންމު ގޯލުތަކެއް ވެސް ކާމިޔާބު ކޮށްފައެވެ. އަދި އެންމެ ފަހުން، ބާސެލޯނާއިން އޭނާގެ ސޮއި މި ހޯދީ 62 މިލިއަން ޕައުންޑުގެ އަގަކަށެވެ.

އޮލްމޯ ހޯދުމަށް ބާސެލޯނާއިން ފެށި ދަތުރުގައި ފުރަތަމަ ލިބުނީ ނާކާމިޔާބީއެވެ. ނަމަވެސް، ނިކޯ ވިލިއަމްސްއަށް ބާސެލޯނާ އިން ހުށަހެޅި ހުށަހެޅުން އޭނާ ގަބޫލު ނުކޮށް އެތުލެޓިކޯގައި މަޑުކުރުމަށް ނިންމުމާ ގުޅިގެން، އެންމެ ފަހުން ބާސެލޯނާގެ ސްޕޯޓްސް ޑިރެކްޓަރ ޑެކޯ ވަނީ ޖަރުމަނަށް ދަތުރުކޮށްފައެވެ. އަދި އޮލްމޯ ބާސެލޯނާއަށް ގެނައުމުގެ ފެހި ސިގްނަލް ލިބުނީ އޭގެފަހުންނެވެ.