އިންޑިއާގެ އެކްސްޓާނަލް އެފެއާޒް މިނިސްޓަރ ޑރ. އެސް ޖައިޝަންކަރު މާލެ ވަޑައިގެންފިއެވެ.

އިންޑިއާގެ އެކްސްޓާނަލް އެފެއާޒް މިނިސްޓަރ ޑރ. އެސް ޖައިޝަންކަރު މިއަދު ހަވީރު މާލެ ވަޑައިގެންނެވުމުން އެމަނިކުފާނަށް ވެލާނާ އިންޓަރނޭޝަނަލް އެއާޕޯޓުން މަރްޚަބާ ވިދާޅުވީ، ރާއްޖޭގެ ފޮރިން މިނިސްޓަރ މޫސާ ޒަމީރެވެ.

ފޮރިން މިނިސްޓްރީން ހާމަކުރައްވާފައިވާ ގޮތުގައި، އިންޑިއާގެ އެކްސްޓާނަލް އެފެއާޒް މިނިސްޓަރ ޑރ. އެސް ޖައިޝަންކަރު މިދަތުރުފުޅުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި ބައްދަލުކުރައްވާނެއެވެ. މިބައްދަލު ކުރެއްވުމުގައި ދިވެހިރާއްޖެއާއި އިންޑިއާއިން ގުޅުން ބަދަހިކުރެވޭނެ ދާއިރާތަކުން ގުޅުން ބަދަހިކުރުމާއި ގުޅޭ ގޮތުން ދެބޭފުޅުން މަޝްވަރާކުރައްވާނެއެވެ.

މީގެ އިތުރުން، އިންޑިއާގެ އެކްސްޓާނަލް އެފެއާޒް މިނިސްޓަރ ޑރ. އެސް ޖައިޝަންކަރާއި ރާއްޖޭގެ ފޮރިން މިނިސްޓަރ މޫސާ ޒަމީރުވެސް ބައްދަލު ކުރައްވަިއ ދެޤައުމުގެ ގުޅުން ރަނގަޅުކޮށް ބަދަހިކުރުމާއި ގުޅޭ ގޮތުން މަޝްވަރާކުރައްވާނެއެވެ.

އިންޑިއާގެ އެކްސްޓާނަލް އެފެއާޒް މިނިސްޓަރ ޑރ. އެސް ޖައިޝަންކަރުގެ މިދަތުރުފުޅުގައި،  އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓްގެ ދަށުން ކުރިއަށްގެންދިޔަ ބައެއް މަޝްރޫޢުތަކުގެ ނިމުން ފާހަގަކުރުމަށް ބާއްވާ ބައެއް ރަސްމިއްޔާތުތަކުގައިވެސް ބައިވެރިވެވަޑައިގަންނަވާނެ ކަމުގައި ރާއްޖޭގެ ފޮރިން މިނިސްޓްރީން ހާމަކުރައްވާފައެވެ. އެމިނިސްޓްރީން ހާމަކުރައްވާފައިވާ ގޮތުގައި، އިންޑިއާގެ އެކްސްޓަރނަލް އެފެއާޒް މިނިސްޓަރުގެ މިދަތުރުފުޅު ނިންމަވާލެއްވުމަށްފަހު އެމަނިކުފާނު ރާއްޖެއިން ފުރާވަޑައިގެންނެވުމަށް ހަމަޖެހިފައި ވަނީ، އާދީއްތަ ދުވަހުގައެވެ.