ޒުވާނުން ނިކުމެ ފަތުރުވެރިކަމަށް އިންވެސްޓުކުރަންވީ ވަގުތު އައިސް ޖެހިއްޖެ ކަމުގައި، ފަތުރުވެރިކަމާއި ބެހޭ ވަޒީރު އިބްރާހީމް ފައިޞަލް ވިދާޅުވެއްޖެއެވެ. މިނިސްޓަރ ފައިސަލް މިހެން ވިދާޅުވީ "ވެލްކަމް އިންޑިއާ ރޯޑް ޝޯވ" ނިންމާލުމަށް ފަހު ނޫސްވެރިންނަށް މައުލޫމާތު ދެއްވަމުންނެވެ.

މިނިސްޓަރ ވިދާޅުވީ ގެސްޓްހައުސް ތަރައްޤީކުރުމަށް މިއަހަރުގެ ތެރޭގައި ޒުވާނުންނަށް ލޯނުގެ ފުރުޞަތުތަކެއް ހުޅުވާލާނެކަމަށެވެ. އެގޮތުން ގެސްޓްހައުސްތަކަށް ޚާއްސަ ލޯނެއް ތައާރަފްކުރުމަށް، ބޭންކް އޮފް މޯލްޑިވްސް (ބީއެމްއެލް) އާއި މޯލްޑިވްސް އިސްލާމިކް ބޭންކް (އެމްއައިބީ) އާއިއެކު މަޝްވަރާކޮށްފައިވާކަމަށް މިނިސްޓަރު ވަނީ ވިދާޅުވެފައެވެ.

މީގެ އިތުރުން، މި ލޯނު ވެގެން ދާނީ އިންޓަރެސްޓު ކުޑަ ލޯނެއް ކަމުގައި ވެސް މިނިސްޓަރު ވިދާޅުވިއެވެ.

މިނިސްޓަރ އިތުރަށް ވިދާޅުވީ، އެ މިނިސްޓްރީ އިން މަސައްކަތް ކުރަމުން ދަނީ ރާއްޖޭގައި ޓޫރިޒަމް ނެތް ރަށްރަށައް ޓޫރިޒަމް ތަރައްޤީކުރުމަށް އަތޮޅުތަކަށް ވަކިވަކި މާސްޓަރ ޕްލޭންއެއް ހެދުމަށެވެ. އަދި އެ މާސްޓަރ ޕްލޭން ނިމުމުން، އެ ޕްލޭނާ އެއްގޮތަށް ފަތުރުވެރިކަން ފުޅާ ކުރުމަށް އިންވެސްޓްމަންޓް ހޯދުމުގެ މަސައްކަތް ކުރާނެގޮތާއި، ގެސްޓްހައުސް ސިނާއަތައް ނެރޭނެ އެނދުގެ އަދަދު އެނގިގެންދާނެކަމަށް ވަޒީރު ވިދާޅުވިއެވެ.