ކުޅުދުއްފުށީ ރީޖަނަލް ހޮސްޕިޓަލުގައި ޕްލާސްޓިކް ސާޖަރީ ހަދަން ފަށައިފިއެވެ. މިއީ މާލެ ފިޔަވާ އިތުރު ރަށެގައި މި ފަރުވާ ފެށި ފުރަތަމަ ފަހަރެވެ.

މި ހިދުމަތާއެކު، އަލިފާނުގެ ޙާދިސާތަކުގައި ސިފަ ގެއްލޭވަރަށް ފިހުމުންނާއި، އެނޫންވެސް އަނިޔާތަކުގައި ލިބޭ އަނިޔާތަކުގެ ސަބަބުން ނުފިލާ ހުންނަ ލަކުނުތަކާއި ފާރުގަނޑުތައް ރަނގަޅުކުރުމުގެ ފަރުވާ ކުޅުދުއްފުށީ ރީނަޖަލް ހޮސްޕިޓަލުން ދޭން ފެށުނީއެވެ.

މި ޚިދުމަތް އެ ހޮސްޕިޓަލުގައި ކުރިއަށް ގެންދިއުމަށް ހަމަޖެހިފައިވަނީ ސަރުކާރުގެ މައި ހޮސްޕިޓަލް، އައިޖީއެމްއެޗާއި ގުޅިގެންނެވެ. އެގޮތުން، ޚިދުމަތް ދެއްވުމުގައި އެ ހޮސްޕިޓަލުގައި އިސްކޮށް އުޅުއްވާނީ އައިޖީއެމްއެޗްގެ އެކްޓިންގ މެޑިކަލް ޑިރެކްޓަރ، ޑިޕާޓްމެންޓް އޮފް ސާޖަރީގެ ހެޑް އަދި ޕްލާސްޓިކް ސާޖަރީގެ ފުރަތަމަ ސަބް ސްޕެޝަލިސްޓް ޑރ. މުޙައްމަދު ވަޙީދުކަމަށް ކުޅުދުއްފުށި ރީޖަނަލް ހޮސްޕިޓަލުން ވަނީ މަޢުލޫމާތު ދެއްވާފައެވެ. ޑރ. ވަޙީދު ވަނީ އެ ހޮސްޕިޓަލަށް ވޫންޑް ކެއަރ އަދި ލެޕްރޮސްކޯޕިކް ސަރޖަރީ ތަޢާރަފު ކުރެއްވުމުގައި ވެސް މުހިއްމު ދައުރެއް އަދާކުރައްވާފައެވެ.

ކުޅުދުއްފުށީ ރީޖަނަލް ހޮސްޕިޓަލުގައި ޕްލާސްޓިކް ސާޖަރީ ހަދަން ފެށުމުގެ ގޮތުން ބޭއްވި ހާއްސަ ރަސްމިއްޔާތުގައި، މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް ޢަބުދުއް ރައްޒާޤް ޙަލީމް އާއި އައިޖީއެމްއެޗް އަދި ކުޅުދުއްފުށި ރީޖަނަލް ހޮސްޕިޓަލްގެ އިސްވެރިން ވަނީ ބައިވެރިވެވަޑައިގަންނަވާފައެވެ.

މި ހާއްސަ ރަސްމިއްޔާތުގައި ވާހަކަފުޅު ދައްކަވަމުން ޑރ. ވަޙީދު ވިދާޅުވީ، ޕްލާސްޓިކް ސަރޖަރީއަކީ ހަމައެކަނި ރީތިވުމަށް ކުރާ ސަރޖަރީއެއް ނޫންކަމަށާއި، އެއީ ނުރައްކާތެރި އެކި ޙާދިސާތަކުގައި ލިބޭ އަނިޔާތަކާއި، ހާނީއްކަ ތަކުގައި ހަށިގަނޑުން ބައެއް މަދުވުމުން މަސް އަރުވައި ހަންގަނޑު އެރުވުމަށް ވެސް ކުރާ ސަރޖަރީތަކެއް ކަމަށެވެ. މީގެއިތުރުން ރަނގަޅުނުވެ ދުވަސްވެފައި ހުންނަ ފާރުގަނޑުތައް ރަނގަޅުކުރުމަށްވެސް އެފަދަ ސަރޖަރީތައް ކުރާކަން ޑރ. ވަޙީދު ފާހަގަކުރެއްވިއެވެ.

ޕްލާސްޓިކް ސަރޖަރީގެ ޚިދުމަތް ކުޅުދުއްފުށީ ރީޖަނަލް ހޮސްޕިޓަލުގައި ފެށިގެންދިޔުމާއެކު މިފަދަ ފަރުވާ ބޭނުންވާ ފަރާތްތަކަށް ބޮޑެތި ލުއިތަކެއް ލިބިގެންދާނެކަމަށް އެހޮސްޕިޓަލުން ބުނެއެވެ. އެހޮސްޕިޓަލުން ބުނީ މިވަގުތު ކުރިއަށްގެންދިޔުމަށް ހަމަޖެހިފައވަނީ އައުޓްރީޗް ޕްރޮގްރާމެއްގެ ގޮތުގައިކަމަށެވެ. އެހެންނަމަވެސް ދެމެހެއްޓެނިވިގޮތުގައި ޚިދުމަތްދިނުމަށް އެދާއިރާ ފުޅާކުރުމުގެ މަސައްކަތްކުރަމުންދާނެކަމަށް ކުޅުދުއްފުށީ ރީޖަނަލް ހޮސްޕިޓަލުން ބުނެއެވެ.