​ވައިގެ މަގުން އަތޮޅުތެރެއަށް މަސްތުވާތަކެތި ގެންދަން އުޅުނު ދިވެހި އަންހެނަކުހައްޔަރުކޮށްފިއެވެ.

ފުލުހުންގެ އިދާރާއިން ވިދާޅުވީ އެމީހާ ހައްޔަރުކޮށްފައި ވަނީ ރޭގައި ވެލާނާ އިންޓަރނޭޝަނަލް އެއާޕޯޓުގެ ޑޮމެސްޓިކް ޓަރމިނަލުން ކަމަށެވެ. ހައްޔަރުކުރި މީހަކީ، އުމުރުން 30 އަހަރުގެ ދިވެހި އަންހެނެކެވެ.

ފުލުހުންގެ އިދާރާއިންް ވިދާޅުވީ އޭނާ ހައްޔަރުކޮށް ބަލައިފާސްކުރި އިރު މަސްތުވާތަކެތި ކަަމަށް ބެލެވޭ އެއްޗެއްހުރި ދެ ރަބަރު ޕެކެޓު ފެނިފައިވާ ކަމަށާއި އެ ތަކެތީގެ ވަގުތީ ބަރުދަނަކީ 209 ގްރާމްހުރި ކަމަށެވެ. އަދި އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ކޯޓުން އޭނާގެ ބަންދަށް 5 ދުވަސް ޖަހައިދީފައިވާ ކަމުގައިވެސް ފުލުހުންގެ އިދާރާއިން ވިދާޅުވިއެވެ.

މި މައްސަލަ ޑްރަގް އެންފޯސްމަންޓުން ގެންދަނީ ތަހުގީގު ކުރަމުންނެވެ.