ސައިކަލު ގަތުމަށް ކިންގްސްޓޮން ހޯލްޑިންގްސް މޯލްޑިވްސް ޕްރައިވެޓް ލިމިޓެޑަށް ފައިސާ ދެއްކުމަށްފަހު، ސައިކަލު ނުލިބޭ ފަރާތްތަކުން، މޯލްޑިވްސް ޕޮލިސް ސާވިސްއަށް އެކަން ހިއްސާ ކުރުމަށް އެދިއްޖެއެވެ.

ފުލުހުން ހާމަކޮށްފައިވާ ގޮތުގައި، އާންމުންނަށް ސައިކަލު ވިއްކާ ކަމަށް ބުނެ، ކޮންހްސްޓޮން އިން މަކަރާއި ހީލަތުން ފައިސާ ނަގާފައިވާ ކަމަށް ތުހުމަތުކުރެވޭ މައްސަލަތަކެއް އެ އިދާރާއަށް ހުށަހެޅިފައިވާތީ، އެ މައްސަލަ އަންނަނީ މިހާރު ތަހުގީގު ކުރަމުންނެވެ.

އެހެންކަމުން، ކިންގްސްޓޮން އިން ހިންގާފައިވާކަމަށް ތުހުމަތު ކުރެވޭ މަކަރާއި ހީލަތުގެ އަމަލުގެ ޝިކާރައަކަށް ވެފައިވާ  އެއްވެސް މީހަކު ހުރިނަމަ، އެ މަޢުލޫމާތު ހިއްސާކުރުމަށް ފުލުހުން ވަނީ އެދިފައެވެ.

ސައިކަލު ގަތުމަށް އެޑްވާންސްކޮށް ގިނަ ބަޔަކު ވަނީ ކިންގްސްޓޮން އަށް ފައިސާ ދައްކާފައެވެ. އަދި އޭގެ ފަހުން ސައިކަލު ނުލިބި 6 މަހަށް ވުރެން ދިގު މުއްދަތެއް ހޭދަވެފައިވާކަމަށް، މި މައްސަލާގައި ހިމެނޭ މީހަކު "ނޫން" އާ ވާހަކަދައްކަމުން ބުނެފައިވެއެވެ. މިކަމާ ގުޅިގެން އެ ފިހާރަ ކައިރީގައި މި ފަހަކަށް އައިސް އެތައް ދުވަހަކު މުޒާހަރާ ވެސް ކޮށްފައިވެއެވެ.