ޚިޔާނާތުގެ ތުހުމަތުތައް ރައީސް ޔާމީނުގެ މައްޗަށް ކުރައްވައި، ދައުލަތުގެ އެއް އަހަރުގެ ބަޖެޓު ފޫބައްދާހައި ފައިސާ ރައީސް ޔާމީނުގެ އެކައުންޓުގައި އެބަހުރި ކަމުގައި ފަލާޙް ވިދާޅުވެއްޖެއެވެ.

ޕީއެންސީގެ ޕާލަމެންޓްރީ ގުރޫޕްގެ ލީޑަރު އިބްރާހީމް ފަލާހް މިހެން ވިދާޅުވީ، ޕީއެންސީން ރޭ ބޭއްވި ހަރުގެ ޖަލްސާގައި ދެއްކި ވާހަކައިގައެވެ.

ފަލާހް ވިދާޅުވީ، ރައީސް ޔާމީނުގެ އަރިހުގައި މިހާރު ތިއްބެވި ޑރ. ޖަމީލާއި މަލީޙް ފަދަ ބޭފުޅުން، ކުރިން ރައީސް ޔާމީނަށް ޚިޔާނާތުގެ ތުހުމަތުތައްކޮށް ދެއްކެވި ވާހަކަތައް މިހާރު ކޮންމެވެސް ވަރަކަށް ޤަބޫލު ކުރެއްވޭ ކަމަށެވެ. މީގެ އިތުރުން ރައީސް ޔާމީންގެ އެކައުންޓްތަކަށް ޖަމާވެފައިވާ ފައިސާ އަކީ، ކެމްޕޭނަށް އެކި ފަރާތްތަކުން އެމަނިކުފާނަށް ދެއްވާފައިވާ ފައިސާ ކަމުގައި އެމަނިކުފާނުގެ މައްޗަށް ހިންގުނު ޝަރީއަތުގެ މަޖިލިސްތަކުގައި އެމަނިކުފާނު ވިދާޅުވެފައިވާކަންވެސް ފަލާޙް ފާހަގަކުރެއްވިއެވެ.

ފަލާހް ވަނީ، ރައީސް ޔާމީނުގެ މައްޗަށް ޚިޔާނާތާއި އޮޅުވައިލުމުގެ ތުހުމަތުތައް ކުރައްވައި ވާހަކަ ދައްކަވާފައެވެ. އަދި ރައީސް ޔާމީނުގެ ވެރިކަމުގައި ހިނގައި ދިޔަ ކަންކަމާއި ގުޅިގެންވެސް އޭނާ ވާހަކަ ދެއްކެވިއެވެ.

ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު، އަދި ޕީއެންސީގެ ޕާލަމެންޓްރީ ގުރޫޕްގެ މެމްބަރުކަން ކުރައްވަމުންދާ އިބްރާހީމް ފަލާޙަކީ، 18 ވަނަ ރައްޔިތުންގެ މަޖިލީހުުގެ މެމްބަރުކަން ކުރެއްވި އިރު، ޕީޕީއެމްގެ މެމްބަރެއްގެ ގޮތުގައި ރައީސް ޔާމީނާއި އެމަނިކުފާނުގެ ސަރުކާރު ދިފާޢު ކުރެއްވުމުގައި ސިޔާސީ ގޮތުން މަސައްކަތް ކުރެއްވި ބޭފުޅެކެވެ. އެހެން ނަމަވެސް 19 ވަނަ ރައްޔިތުންގެ މަޖިލީހުގެ އިންތިޚާބުގައި ކުރިމަތިވި ނާކާމިޔާބީއަށް ފަހުގައި ގިނަ ދުވަސްތަކަކަށް އޭނާ ސިޔާސީ މައިދާނުން ގެއްލުމަށް ފަހުގައި، އަލުން ސިޔާސީ ގޮތުން ހަރަކާތްތެރިވާން ފެށީ ރައީސުލްޖުމްހޫރިއްޔާ ކަމުގެ މަޤާމަށް ޑރ. މުޙައްމަދު މުޢިއްޒު އިންތިޚާބުވުމާއި ގުޅިގެންނެވެ.