އެޕާޓްމެންޓަކަށް ވަދެ 26،000 އަށް ވުރެން ގިނަ ރުފިޔާ ފޭރިގަތް މީހަކު އަންގާރަ ދުވަހު ހައްޔަރުކޮށްފިއެވެ. ފުލުހުން ހާމަކޮށްފައިވާ ގޮތުގައި މި ހާދިސާ ހިނގާފައިވަނީ ވެސް އަންގާރަ ދުވަހުއެވެ.

މި މައްސަލައިގައި ހައްޔަރު ކޮށްފައިވަނީ މ. ދިންމަނަގޭ އުމުރުން 32 އަހަރުގެ އަބްދުﷲ ތިލްމީޒެވެ.

ފުލުހުން ވަނީ މީނާގެ ވަނަވަރު ހާމަކޮށްފައެވެ. އަދި އޭނާ ފޭރުނު 26،690ރ. ވަނީ އެ ފައިސާގެ ވެރިފަރާތާއި ހަވާލުކޮށްފައެވެ.

ތިލްމީޒަކީ ކުށުގެ ރެކޯޑު ކުރިން ވެސް އޮންނަ މީހެކެވެ. އެގޮތުން 2012 ވަނަ އހަރުގެ އެޕްރީލް މަހު ވެސްޓް ޕާކް ކައިރީގައި ތޫނު އެއްޗަކުން ހަމަލާދީ މ. ފެއަރީކޯނާ އަލީ ޝިފާން މަރާލި މައްސަލާގައި ދައުވާ ކުރި އެކަކެވެ.

ނަމަވެސް އެ މައްސަލައިގައި ހިމެނޭ އެއްވެސް މީހެއްގެ މައްޗަށް ކުށް ސާބިތު ނުވާކަމަށް ކްރިމިނަލް ކޯޓުން ހުކުމް ކުރީ 2013 ގައެވެ.

އޭގެ ތެރެއިން ތިން މީހެއްގެ މައްސަލަ ދައުލަތުން ހައި ކޯޓުގައި އިސްތިއުނާފު ކުރިއިރު އޭގެ ތެރޭގައި ތިލްމީޒުގެ މައްސަލަ ހިމެނެ އެވެ. ނަމަވެސް އޭނާ ވަނީ ހައިކޯޓުން ވެސް ސަލާމަތް ވެފައެވެ.