ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ވެރިކަމުގެ ދައުރު ފުރިހަމަ ނުކުރެއްވިދާނެކަމަށް ވިދާޅުވެ، ކުރީގެ ހޯމް މިނިސްޓަރ އުމަރު ނަސީރު ވާހަކަފުޅު ދައްކަވައިފިއެވެ.

އުމަރު މިމޭރުމުން ވާހަކަފުޅު ދައްކަވާފައި ވަނީ، ރާއްޖެ ޓީވީން ހޯމަ ދުވަހު ގެނެސްދިން ޕްރޮގްރާމެއްގައި ވާހަކަފުޅު ދައްކަވަމުންނެވެ.

އުމަރު ނަސީރު ވިދާޅުވީ، ރައީސް ޑރ. މުޙައްމަދު މުޢިއްޒަަށް ވެރިކަމުގެ ދައުރު ފުރިހަމަ ނުކުރެވޭނެ ކަމަށް ބައެއް ފަރާތްތަކުން ވާހަކަދައްކަމުން ގެންދާ ކަމަށާއި، އެކަން އޭނާވެސް ޤަބޫލުކުރައްވާ ކަމަށެވެ. އޭގެ ސަބަބެއް ކަމުގައި އުމަރު ވިދާޅުވީ، ރައީސް މުޢިއްޒު ދައްކަވާ ވާހަކަފުޅުތަކާއި އެމަނިކުފާނު ޢަމަލު ކުރައްވަމުންގެންދަވާ ގޮތްތައް ތަފާތު ވުމެވެ.

އުމަރު ފާހަގަކުރެއްވި ގޮތުގައި، ރައީސް ޑރ. މުޙައްމަދު މުޢިއްޒުވެ ވެރިކަން ވެއްޓިގެން ދިޔުމުގެ ސަބަބަކަށް ވެގެންދާނީ އެމަނިކުފާނު އެކި ކަންކަމުގައި ހައްދަވާފައިވާ އިތުރުފުޅުތަކެވެ. މިގޮތުން އިންޑިއާ ސިފައިން ރާއްޖެއިން ބޭލުމުގައި ޢަމަލު ކުރެއްވި ގޮތާއި، އިޒްރޭލް ޕާސްޕޯޓް މަނާކުރުމުގައި ޢަމަލުކުރައްވަމުން ގެންދަވާ ގޮތާއި، ރާއްޖޭގެ މާލީ ހާލަތާއި އިޤުތިޞާދަށް އަންނަމުންދާ ހީނަރުކަން އުމަރު ފާހަގަކުރެއްވިއެވެ.

މިނިސްޓަރ އުމަރު ވިދާޅުވީ، މިސަރުކާރަށް އޭނާ ދެއްވާނީ 100 އިން 40 މާކްސް ކަމަށެވެ. އަދި ރައީސް މުއިއްޒު އިތުރުފުޅު ހައްދަވަނީ މާގިނައިން ކަމުގައިވެސް އުމަރު ވިދާޅުވިއެވެ. މިގޮތުން ރައީސް ޔާމީން މިނިވަންކުރެއްވުމާއި ގުޅޭ ގޮތުން ދެއްކެވި ވާހަކަފުޅުތަކާއި ޤައުމިއްޔަތާއި ގުޅޭ ގޮތުން ދެއްކެވި ވާހަކަފުޅުތަކަކީ، ވެރިކަން ހޯއްދެވުމަށް ދެއްކެވި ވާހަކަފުޅު ތަކެއް ކަމުގައި އުމަރު ވިދާޅުވިއެވެ. އުމަރު ވިދާޅުވީ، އޭނާ އެންމެ ކަންބޮޑުވެވަޑައިގަންނަވަނީ، އިޒްރޭލް ޕާސްޕޯޓު މަނާކުރުން ދިގުދަންމަމުން ގެންދިޔުމާއި، އިންޑިއާ ސިފައިން ބޭރު ކުރުމާއި ގުޅޭ ގޮތުން ޢަމަލުކުރެއްވި ގޮތް ކަމަށެވެ.

އުމަރު ވިދާޅުވީ 2026 ވަނަ އަހަރު، އިޤުތިޞާދީދަތިތައް ވަރަށް ބޮޑުވެގެންދާނެ ކަމަށެވެ. އަދި އެފަދަ ހާލަތަކާއި ގުޅުވައި، ސްރީލަންކާގައި ބޮޑުވަޒީރު މަހިންދަ ރާޖަ ޕަކްސާ އާއި ރައީސް ގޮތަބަޔަ ރާޖަޕަކްސާގެ ވެރިކަން ނިމިގެން ދިޔަ ގޮތް އުމަރު މިސާލެއްގެ ގޮތުން ފާހަގަކުރެއްވިއެވެ. އަދި ދިވެހިރާއްޖޭގެ މިސްރާބުވެސް ހުރީ އެފަދަ ދިމާލަކަށް ކަމުގައި އުމަރު ވިދާޅުވިއެވެ.

ރައީސް ޔާމީނުގެ ވެރިކަމުގައި ހޯމް މިނިސްޓަރުކަން ކުރެއްވި އުމަރު ނަސީރަކީ، 2012 ވަނަ އަހަރު އެމްޑީޕީގެ ސަރުކާރު ވައްޓާލުމަށް ކުރި މުޒާހަރާތަކާއި ހަޅުތާލުތަކުގައި އިސްކޮށް ހަރަކާތްތެރިވި ފަރާތެކެވެ. ހަރުކަށި ސިޔާސަތު ތަކަށް ތާޢީދުކުރައްވާ އުމަރު ނަސީރަކީ، ދެ ފަހަރަށް ރިޔާސީ އިންތިޚާބުގައި ވާދަކުރައްވައި ނާކާމިޔާބީއާ ކުރިމަތިލައްވަން ޖެހިވަޑައިގެންނެވި ލީޑަރެކެވެ. 

2008 ވަނަ އަހަރާއި 2023 ވަނަ އަހަރުގެ ރިޔާސީ އިންތިޚާބުގައި އުމަރު ނަސީރު ވާދަކުރެއްވި އިރު، އެންމެ ފަހުން ބޭއްވި ރިޔާސީ އިންތިޚާބުގައި އުމަރަށް ތާއީދުކުރާ މީހުންގެ ނިސްބަތް މަތިވެފައިވެއެވެ.