ކަރަންޓު އިޤުތިޞާދު ކުރުމަށް ކުރެވިދާނެ ކަންކަމާއި ގުޅޭ އިލްމީ ދިރާސާއެއް ހެދުމަށް މޯލްޑިވްސް ނެޝަނަލް ޔުނިވަސިޓީއާއި އެކު ސްޓެލްކޯއިން ފަހުމުނާމާއެއްގައި ސޮއިކޮށްފިއެވެ.

މިފަހުމު ނާމާގައި ސްޓެލްކޯގެ ފަރާތުން ސޮއެކުރެއްވީ އެކުންފުނީގެ މެނޭޖިންޑައިރެކްޓަރ ޙުސައިން ފަޙްމީއެވެ. އަދި އެމްއެންޔޫގެ ފަރާތުން އެއްބަސްވުމުގައި ސޮއެކުރެއްވީ އެމްއެންޔޫގެ ވައިސް ޗާންސެލަރ ޑރ. އައިޝަތު ޝެހެނާޒް އާދަމްއެވެ.

ސްޓެލްކޯއިން ހާމަކޮށްފައިވާ ގޮތުގައި، މި ފަހުމުނާމާގެ މައިގަނޑު ދާއިރާއަކީ، ބިލްކުރުމުގައި ދިމާވާ އެކި މައްސަލަތަކުގެ އަސްލު ސަބަބުތައް ދިރާސާކޮށް، ކަރަންޓު ބޭނުންކުރާ ވައްޓަފާޅި (ކޮންސިއުމަންޓް ޕެޓަރންސް) އާއި މޫސުމީ ބަދަލުގެ ސަބަބުން އެކަމަށް ކުރާ އަސަރު ދެނެގަނެ، ބިލްކުރުމުގެ ނިޒާމުގައި ހާމަކަން ބޮޑުކަމާއި، ޞައްޙަކަމާއި، ކަސްޓަމަރުންގެ ހިތްހަމަޖެހުން އިތުރުކުރުމުގެ ގޮތްތައް އެކުލަވައިލުމެވެ. މިގޮތުން މިދިރާސާގައި 2014އިން 2024އަށް ފާއިތުވެ ދިޔަ 10 އަހަރުގެ ޑާޓާތައް އެނަލައިޒްކުރާނެ ކަމުގައިވެސް ސްޓެލްކޯއިން ހާމަކުރައްވާފައިވެއެވެ.

މިދިރާސާއިން ހާސިލްކުރަން ބޭނުންވާ ކަންކަމުގެ ތެރޭގައި ހިމެނެނީ، 

• ކަރަންޓު ބޭނުންކުރާ ވައްޓަފާޅި

• ބިލްކުރުމުގެ ޞައްޙަކަން ވަޒަންކުރުން

• އެނަރޖީ އެފިޝަންސީ އިތުރުކުރުމަށް ހުރި ފުރުޞަތުތައް ދެނެގަތުން

• ކަސްޓަމަރުންގެ ހިތްހަމަޖެހުން

• މާލީ ގޮތުން މަސައްކަތް ކުރެވޭ ފެންވަރު؛ ކަމުގައި ސްޓެލްކޯއިން ހާމަކުރައްވާފައިވެއެވެ.

މީގެ އިތުރުން މި ދިރާސާއިން ޙާޞިލްކުރަން ބޭނުންވާ ކަންކަމުގެ ތެރޭގައި:

1. ކަސްޓަމަރުންގެ އެކި ކެޓަގަރީތަކުގެ (ރެސިޑެންޝަލް، ކޮމާޝަލް، އިންޑަސްޓްރިއަލް) ކަރަންޓު ބޭނުންކުރާ ވައްޓަފާޅި ދެނެގަތުން

2. އެންމެ ގިނައިން ކަރަންޓު ބޭނުންކުރާ ވަގުތުތަކާއި، މޫސުމީ ބަދަލުގެ ސަބަބުން ކަރަންޓު ބޭނުންކުރާ ވައްޓަފާޅިއަށް ކުރާ އަސަރު ދެނެގަތުން

3. މީޓަރ ކުރެވިފައިވާ ޔޫސޭޖް ޑޭޓާ އާއި ބިލްކުރެވޭ އަދަދުތަކާ އަޅާކިޔައިގެން ކަރަންޓް ބިލްތަކުގެ ޞައްޙަކަން ކަށަވަރުކުރުން

4. ބިލްކުރުމުގައި ގޯސްތަކެއް ހުރިނަމަ، ހުރި ގޯސްތަކާއި ހުރި މިންވަރު ދެނެގަނެ އަދަދުކުރުން

5. ކަސްޓަމަރުންނަށް ކަރަންޓް ބޭނުންކުރުން މަދުކޮށް، ޚަރަދު ކުޑަކުރެވޭނެ ދާއިރާތައް ދެނެގަތުން

6. ކަރަންޓް ބިލާ ގުޅޭގޮތުން ކަސްޓަމަރުންގެ ޝަކުވާތަކާއި ޚިޔާލު ދެނެގަތުން

7. ކުންފުނީގެ އިސްތިރާޖު ކަނޑައެޅުމާއި ގޮތް ނިންމުމުގެ މަރުޙަލާތަކަށް އެހީތެރިވުމަށްޓަކައި ޚިޔާލުދީ، ތަފާސް ހިސާބާއި ދިރާސާގެ މައްޗަށް ބިނާކުރާ މަޝްވަރާ ފޯރުކޮށްދިނުން؛ ހިމެނޭ ކަމުގައިވެސް ސްޓެލްކޯއިން ހާމަކުރައްވާފައި ވެއެވެ.

ގޭބިސީތަކުގައި ކަރަންޓް ބިލްތައް ބޮޑުވަމުން އަންނަ މައްސަލައިގައި، އާއްމު ފަރާތްތަކުން އަންނަނީ ސްޓެލްކޯއަށް ގިނަ ތުހުމަތުތައް ކުރަމުންނެވެ. އެހެންކަމުން އެތުހުމަތުތަކުން ބަރީޢަވެ ސްޓެލްކޯގެ ނަޒާހަތްތެރިކަން ހާމަކުރުމަށް އެކުންފުނިން އަންނަނީ ގިނަ މަސައްކަތްތަކެއް ކުރަމުންނެވެ.