މެދު ރާއްޖެ ތެރޭގެ އަތޮޅުތަކަށް މޫސުމް ގޯސްވެ ކަނޑު ގަދަ ވުމުގެ ސަބަބުން ރޭގައި 6 ހާދިސާއެއް ހިގާފައިވާ ކަމުގައި އެމްއެންޑީއެފުން ވިދާޅުވެއްޖެއެވެ.

އެމްއެންޑީއެފުން ހާމަކުރައްވާފައިވާ ގޮތުގައި އެންމެ ގިނަ ހާދިސާތަކުގެ ރިޕޯޓްތައް ލިބިފައި ވަނީ ތ. އަތޮޅާއި ލ. އަތޮޅުންނެވެ. މިގޮތުން، 9 ފަތުރުވެރިންނާ 5 ފަޅުވެރިންނާއެކު ދަތުރުކުރި 'ކޮޅުލިޔާ' ނަމަކަށްކިޔާ ސަފާރީ  ތިމަރަފުށި އެއަރޕޯޓް ބީޗަށް ލައްވުމުގެ ހާދިސާއެއް ރޭ ވަނީ ހިނގާފައެވެ.  އެ ހާދިސާގެ ކޯސްޓްގާޑަށް ރިޕޯޓްކޮށްފައި ވަނީ 01:10 ހާއިރު ކަމަށާއި، މިހާރު އެސަފާރީގައި ތިބި މީހުން ތިބީ ތިމަރަފުށީގެ ގެސްޓްހައުސްއެއްގައި ކަމަށްވެސް އެމްއެންޑީއެފުން ވިދާޅުވިއެވެ. އަދި މިހާދިސާގައި އެއްވެސް މީހަކަށް އަނިޔާއެއް ލިބިފައި ނުވާކަމުގައިވެސް އެމްއެންޑީއެފުން ވިދާޅުވިއެވެ.

މީގެ އިތުރުން ރޭ ވަނީ، ބާޖެއް ކަފުޖަހައިގެން ދަތުކުރި ޓަގުބޯޓެއްގެ ވައު ކަނޑައިގެން ދިޔުމުގެ ހާދިސާއެއް ހިނގައި، އެބާޖު ތ. ގުރައިދޫ ގޮނޑުދޮށަށް ލައްވެފައެވެ. މިހާދިސާ ހިނގާފައި ވަނީ، ރޭގެ 2:54 ގައެވެ.

ރޭ ވަނީ ކަނޑު ގަދަވުމުގެ ސަބަބުން ދޯނި ފަހަރު ދިޔަވުުމުގެ ތިން ހާދިސާ އަކާއި، އިންޖީނު ހުއްޓުމުގެ އެއް ހާދިސާއެއް ރިޕޯޓްކޮށްފައެވެ. މިގޮތުން، 10 މީހުންނާއި އެކު ދަތުރުކުރި، ސައުތު އެކްސްޕްރެސް ދޯންޏެއް، ދިޔަވަމުންދާކަމަށް ރޭގެ 2:48ގައި ރިޕޯޓު ލިބުނު ކަމަށާއި، މިއަދު ހެނދުނު 9:00 ހާއިރު އެ ދޯނި ލ. މާމެންދޫ ފަޅަށް ވައްދާފައިވާ ކަމުގައި އެމްއެންޑީއެފުން ވިދާޅުވިއެވެ. އަދި ފިޝްމަން' ކިޔާ މަސް ދޯންޏެއް ލ. އަތޮޅަށް ދަތުރުކުރަނިކޮށް ލ. ހިތަދޫގެ 23 މޭލު ބޭރުން ދިޔަވާކަމަށް ރޭ ފަތިހު 03:20 ހާއިރު ރިޕޯޓްކޮށްފައިވާ ކަމަށާއި، އެދޯނި ލ. ހިތަދޫ ބަދަރަށް ވައްދާދީފައި ވާކަމުގައިވެސް އެމްއެންޑީއެފުން ވިދާޅުވިއެވެ.

މޫސުމް ގޯސްވުމުގެ ސަބަބުން ދިޔަވަމުން ދިޔުމުގެ ހާދިސާއެއް ރޭ ވަނީ، ފ އަތޮޅުންވެސް ރިޕޯޓުކޮށްފައެވެ. އެމްއެންޑީއެފް ވިދާޅުވީ، 80 ފޫޓްގެ ފާގަަތި ނަމަކަށް ކިޔާ ދޯންޏެއް ދިޔަވުމުގެ އެހާދިސާގައި އެދޯނީގައި ހުރި ބިދޭސީ ފަޅުވެރިއަކަށް އަނިޔާވެ އޭނާ ފ. ނިލަންދޫގައި ހުންނަ ފ. އަތޮޅު ހޮސްޕިޓަލަށް ގެންގޮސް ފަރުވާ ދެމުންދާ ކަމަށެެވެ. މި ދޯނި ދިޔަވަމުންދާކަމުގެ ކޯސްޓްގާޑަށް ރިޕޯޓްކޮށްފައި ވަނީ ރޭގެ ފަތިހު 5:00 ހާއިރުގައި ކަމަށްވެސް އެމްއެންޑީއެފުން ވިދާޅުވިއެވެ.

ކަނޑުމަތީގެ ހާދިސާތަކުގެ ތެރެއިން، ރޭ ވަނީ ދޯންޏެއްގެ އިންޖީނު ހުއްޓުމުގެ ހާދިސާއެއްވެސް ހިނގާފައެވެ. އެމްއެންޑީއެފުން ވިދާާޅުވީ، 6 މީހުންނާއެކު ދަތުރުކުރި ' ބިނާ ކާގޯ' ކިޔާ ސަޕްލައި ދޯންޏެއް ލ. ހިތަދޫގެ 11 މޭލު ބޭރުން އިންޖީން ހުއްޓި ދިޔަވަމުންދާކަމަށް ރޭގެ 02:43 ހާއިރު ކޯސްޓްގާޑަށް ރިޕޯޓްކޮށްފައިވާ ކަމަށެވެ. އަދި އެދޯންޏަށްވެސް އެމްއެންޑީއެފުން އެހީތެރިކަން ފޯރުކޮށްދީފައިވާ ކަމުގައި އެމްއެންޑީއެފުން ވިދާޅުވިއެވެ.

ކަނޑުމަތީގެ ގިނަ ހާދިސާތަކެއް ރޭގައި ހިނގާފައި ވާއިރު، މޫސުމާއި ބެހޭ ޤައުމީ އިދާރާއިން އޮތީ އިއްޔެ އާއި މިއަދުވެސް އެ އަތޮޅުތަކަށް ވައިޓް އެލާޓް ނެރެފައެވެ. މިގޮތުން ކޮޅުމަޑުލާއި ހައްދުންމައްޗާއި ހުވަދު އަތޮޅުގެ ރަށްތަކަށް ބޯކޮށް ވާރޭ ވެހޭނެކަމަށް ލަފާކޮށްފައި ވާއިރު، ވިލާގަނޑުގަިއ ގަޑިއަކު 40 މޭލަށް ވައިގަދަވެ ކަނޑުތައް ގަދަވާނެ ކަމުގައި މޫސުމާއި ބެހޭ ޤައުމީ އިދާރާއިން ލަފާކޮށްފައިވެއެވެ.