ސަރުކާރުގެ ބޯހިޔާވަހިކަމުގެ މަޝްރޫއުތަކުން، މާލެއާއި ރާއްޖޭގެ އެކި ސަރަހައްދުތަކުގައި ތަރައްގީ ކޮށްފައިވާ ހައުސިން ޔުނިޓުތަކަށް ދައްކަންޖެހޭ ފައިސާ މަހުން މަހަށް ދައްކަމުން ނުދާތީ، އެކަން ތަކުރާރުވަމުން ދާނަމަ ފިޔަވަޅު އަޅާނެ ކަމުގެ އިންޒާރު، ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާއިން ދީފިއެވެ.

އާދީއްތަ ދުވަހުގެ ރޭ އެ މިނިސްޓްރީއިން އާންމުކުރި އިއުލާނެއްގައި ބުނީ، 1 ޖެނުއަރީ 2024 އިން ފެށިގެން، ފުލެޓުތަކުގެ ކުލި %20 ކުޑަކޮށްދީފައިވީ ނަމަވެސް، އެތަންތަނުގެ ކުލި ގަވާއިދުން ނުދައްކާ ކަމަށެވެ.

މީގެ އިތުރުން، ފުލެޓުތައް ދޫކޮށްފައިވާ ބޭނުން ނޫން އެހެން ބޭނުންތަކަށް ފުލެޓުތައް ބޭނުން ކުރުމާއި، ގަވާއިދާއި ޚިލާފަށް ފްލެޓަށް ބަދަލު ގެނައުމާއި، އެ ތަންތަން ކުއްޔަށް ދިނުމާ ގުޅޭ މައްސަލަތައް މިނިސްޓްރީ އިން ބަލަމުން އަންނަ ކަމަށް ފާހަގަކޮށްފައިވެއެވެ. އަދި މައްސަލަ ބެލުމަށްފަހު، ގަވާއިދުގައިވާ ގޮތުގެ މަތީން އެ ފަރާތްތަކާ މެދު ފިޔަވަޅު އަޅާނެކަމަށް ބުނެފައި ވެއެވެ.

ބޯހިޔާވަހިކަމުގެ އެންމެ ދަތިހާލުޖެހިފައިވާ މީހުންކަމަށް ކަނޑައަޅައި، ސަރުކާރުން ދޫކޮށްފައިވާ ގިނަ ފްލެޓުތައް ކުއްޔަށް ދޭކަން ސާބިތުވާ އެއް ގޮތަކީ، އެޕާޓްމެންޓްތައް ކުއްޔަށްދޭ ވެބްސައިޓު ނުވަތަ ސޯޝަލް މީޑީއާ ޕްލެޓްފޯމްތަކުގައި މިފަދަ ތަންތަން ކުއްޔަށް ދޫކުރަން ޖަހާފައި ހުރުމެވެ. މަހު ކުއްޔަށާއި ދުވަހު ކުއްޔަށް ވެސް މި ތަންތަން އަންނަނީ ދޫކުރަމުންނެވެ. މި ތަންތަނުން އާމްދަނީ ހޯދުމަށްފަހު ދައުލަތަށް ދައްކަން ޖެހޭ ކުލި ނުދައްކާ މީހުން ވެސް ވަރަށް ގިނައެވެ. ނަމަވެސް، އެއްވެސް ސަރުކާރަކުން މިވީހާ ތަނަށް މިކަމަށް އެކަށޭނަ ފިޔަވަޅެއް އަޅާފައެއް ނުވެއެވެ.