ނ. ހެނބަދޫ ޕޮލިސް ޑެސްކުގައި މަސައްކަތް ކުރަމުންދާ ފުލުހެއްގެ ސައިކަލަށް ގެއްލުންދީ، އެހެން ފުލުހެއްގެ ސައިކަލު ރޯކޮށްލި މައްސަލައިގައި އެ ރަށުން ދެ ފިރިހެނަކު މިއަދު ހައްޔަރުކޮށްފިއެވެ.

ފުލުހުން ހާމަކޮށްފައިވާ މައުލޫމާތަށް ބަލާއިރު، އެ މައްސަލައިގައި ހައްޔަރުކޮށްފައިވަނީ ހެނބަދޫ ސެލްވިޔޯ، އިލްޔާސް އިބްރާހީމާއި އެ ރަށު ހުދުތަރި މުހައްމަދު އިރުޝާދުއެވެ. މި ދެ މީހުންނަކީ ވެސް އުމުރުން 33 އަހަރުގެ ދެ މީހުންނެވެ.

ފުލުހުން އިތުރަށް ހާމަކޮށްފައިވާ ގޮތުގައި، މި ދެ މީހުން ހައްޔަރު ކުރި އިތުރު ސަބަބުތަކުގެ ތެރޭގައި، ހެނބަދޫ ޕޮލިސް ޑެސްކުގައި މަސައްކަތްކުރާ ފުލުހުންނާއި އެ ފުލުހުންގެ އާއިލާތަކާއި މުދަލަށް ގެއްލުން ދޭނެ ކަމަށް ބުނެ އިންޒާރު ދިނުން ވެސް ހިމެނެއެވެ.

މި މައްސަލައާ ގުޅިގެން، ފުލުހުންގެ ތަރުޖަމާނު އަޙުމަދު ޝިފާން "އެކްސް" ގައި ހުކުރު ދުވަހު ކޮށްފައިވާ ޕޯސްޓެއްގައި ބުނެފައިވަނީ، މިކަމަކީ ނޫނު އަތޮޅުގައި ފުލުހުން ހިންގަމުންދާ މަސްތުވާތަކެތީގެ އޮޕަރޭޝަނަކާއި ދެކޮޅަށް އެކަމުގައި ތުހުމަތު ކުރެވޭ ބަޔަކު ކޮށްފައިވާ ކަމެއްކަމަށް ތުހުމަތުކުރެވޭ ކަމަށެވެ.

ހެނބަދޫގައި ޑިއުޓީ އަދާކުރަމުން އަންނަ ފުލުހެއްގެ ސައިކަލަށް ފުރަތަމަ ގެއްލުންދިނީ މިދިޔަ ހަފްތާގެ ބުދަ ދުވަހުގެ ރެއެވެ. އެރޭ ވަނީ ފުލުހެއްގެ ސައިކަލުގެ މަޑީގައި ކަޓަރު އަޅާފައެވެ. އަދި ޖެހިގެން އައި ރޭ ވަނީ އެހެން ފުލުހެއްގެ ސައިކަލު ރޯކޮށްލައިފައެވެ.