މި ދުވަސްކޮޅު ސޯޝަލް މީޑިއާގައި އެންމެ ވައިރަލް ވެގެން އުޅޭ އެކަކީ، އާދައިގެ ގޮތަކަށް ހުރެ، އެއް ޖީބަށް އަތްޖަހާލައިގެން ޝޫޓުކޮށް، ޕެރިސް އޮލިމްޕިކްސް ގައި ރިހި މެޑަލް ހޯދި ތުރުކީގެ ޔޫސުފް ޑިޗެޗްއެވެ.

ތުރުކީގެ މި ޕިސްޓޯލް ޝޫޓަރ ގިނަ މީހުން ސިފަ ކުރަނީ، އޮލިމްޕިކްސް އަށް ދިޔަ ވަރަށް އާދައިގެ މީހެއް ގޮތަށެވެ. އަދި ބައެއް މީހުން، އޭނާގެ ބަޑި ޖެހުމުގެ "ކޫލް" ކަމަކީ، އޭނާއަކީ "ހިޓްމޭން" ނުވަތަ ފައިސާ ދީގެން މީހުން މެރުމަށް ހާއްސަ މީހަކަށް ވުމުން ކަމަށް ވެސް ސޯޝަލް މީޑިއާގައި ބުނެފައި އެބަހުއްޓެވެ.

ނަމަވެސް ޑިޗެޗްއަކީ ތުރުކީގެ ޕްރޮފެޝަނަލް ޕިސްޓޯލް ޝޫޓަރ އެކެވެ. އެގޮތުން، އުމުރުން 51 އަހަރުގެ ޑިޗެޗް ވަނީ ބެއިޖިން 2008 ގެ އޮލިމްޕިކްސްގެ ފަހުން، އޮލިމްޕިކްސްގެ ހުރިހާ މުބާރާތެއްގައި ވެސް ޝޫޓިންގައި ތުރުކީ ތަމްސީލުކޮށްފައެވެ.

ޑިޗެޗްގެ މި ތާރީހީ ފޮޓޯ ވެގެން ގޮސްފައިވަނީ، އޮލިމްޕިކްސްގައި ތުރުކީއަށް ވެސް ވަރަށް ތާރީހީ ފޮޓޯއަކަށެވެ. ވައިރަލް ވެގެން އުޅޭ ފޮޓޯގައި ޑިޗެޗް ތައްޔާރަށް އެ ހުރީ އޭނާ ސިލްވަރ މެޑަލް ކާމިޔާބުކުރި ބުރުގައި ޝޫޓު ކުރުމަށެވެ. އަދި އެ މެޑަލްއަކީ، ތުރުކީއަށް އޮލިމްޕިކްސް ގައި ޝޫޓިން އިން ލިބުނު ފުރަތަމަ މެޑަލްއެވެ. އެއީ މިކްސް 10 މީޓަރު އެއަރ ޕިސްޓޯލް ޝޫޓިން ގައި ސެއްވަލް އިލޭޑާ ތަރްހާންއާއެކީ އޭނާ ހޯދި މެޑަލް އެކެވެ.

ޑިޗެޗް އާ ހިލާފަށް، އޭނާގެ ޕާޓުނަރު ތަރްހާން ވަނީ ޝޫޓިން ގިއަރ ބޭނުން ކޮށްފައެވެ. ނަމަވެސް އޭނާ ވެސް ހުރީ ޝޫޓުކުރި އިރު އެއް ޖީބަށް އަތް ޖަހައިގެންނެވެ.

އިންޑިވިޖުއަލް ޝޫޓިން ގައި ޑިޗެޗް އަށް ލިބުނީ 13 ވަނައެވެ. އަދި މިހާރު އޭނާއަށް ވަނީ އޮލިމްޕިކްސް ނިމިފައެވެ.

ޝޫޓިންއަށް ފަހު ދިން އިންޓަވިއު އެއްގައި ޑިޗެޗް ބުނީ، އޭނާ އޮލިމްޕިކްސްގައި އަދި ފެންނާނެ ކަމުގެ އުއްމީދު އެބައޮތްކަމަށާއި، ލޮސް އޭންޖެލްސް 2028 ގައި ރަން މެޑަލް ހޯދުމުގެ ހުވަފެން ދެކޭ ކަމަށެވެ.