އިންޓަނެޓް ބޭންކިން އަދި ފަވަރަ މެދުވެރިކޮށް މުސާރަ އާއި ބޮޑެތި އަދަދުތައް ޕްރޮސެސްކުރުން ބޭންކް އޮފް މޯލްޑިވްސް (ބީއެމްއެލް) އިން މެދުކަނޑާލައިފިއެވެ. 

މިކަން ހާމަކޮށް ބީއެމްއެލްއިން ސޯޝަލް މީޑިއާގައި ކުރި ޕޯސްޓެއްގައި ބުނީ މުސާރަ އާއި ބޮޑެތި އަދަދުތައް ޕްރޮސެސްކުރުމަށް ގެނައި ބަދަލާ ގުޅިގެން، ދެން އެ ހިދުމަތްތައް ހޯދަން ޖެހޭނީ ކުރިން ވެސް އެ ހިދުމަތްތައް ހޯދިގޮތަށް އީމެއިލް ކޮށްގެން ކަމަށެވެ. އެގޮތުން، ބޭންކުން ބުނީ [email protected] އަށް އީމެއިލް މެދުވެރިކޮށް އެދިލެއްވުމުން، މުސާރަ އާއި ބޮޑެތި އަދަދުތައް ޖަމާކުރުން ޕްރޮސެސް ކުރާނެ ކަމަށެވެ.

މިފަދަ ބަދަލެއް ބީއެމްއެލްގެ ހިދުމަތްތަކަށް މި ގެނައީ ބެލެވޭ ގޮތުގައި މިދިޔަ ހަފްތާގައި މީހެއްގެ އެކައުންޓަށް 77 ބިލިއަން ޑޮލަރު ޖަމާކުރުމަށްފަހު، އެއީ އޮޅިގެން ކުރެވުނު ކަމެއްކަމަށް ބުނުމަށްފަހުއެވެ. 

77 ބިލިއަން ޑޮލަރުގެ މައްސަލައިގައި ބޭންކުން ބުނީ، އެއީ “ހިއުމަން އެރާރ” އެއް ކަމަށާއި، އެ ފައިސާ އަނބުރާ ހޯދާފައިވާ ކަމަށެވެ. 

މި މައްސަލާގައި އެ ބޭންކަށް މާލީ ގޮތުން އެއްވެސް ގެއްލުމެއް ވެފައި ނުވާ ކަމަށާއި މިކަން މެދުވެރިވީ ޕޭރޯލް ހެދުމުގައި ގެންގުޅުނު ބަލްކް ޕޭމަންޓް ސިސްޓަމަށް ގެނައި ބަދަލެއްގެ ސަބަބުންކަމަށް ވެސް ބޭންކުން ވަނީ ބުނެފައެވެ.