ސްޓެލްކޯއިން އެންމެ ފަހުން ފޮނުވި ކަރަންޓް ބިލްތައް އޭގެ ކުރީ މަހާއި އަޅާ ބަލާއިރު ނިސްބަތުން ގިނަ ގޭބިސީތަކަކަށް ކުޑަވެފައިވާކަންސް ސްޓެލްކޯއިން ފާހަގަކޮށްފިއެވެ.

ސްޓެލްކޯއިން ފަރާތުން ފޯރުކޮށްދޭ ކަރަންޓް ޚިދުމަތުގެ ބިލްތައް އާދާޔާއި ޚިލާފަށް ބޮޑު ކަމުގެ ޝަކުވާތައް ފާއިތުވި ދެތިން މަހުގައިވެސް އާއްމުން ގެންދިޔައީ ކުރަމުންނެވެ. މިއަދު ސްޓެލްކޯއިން ބޭއްވި ނޫސްވެރިންގެ ބައްދަލުވުމުގައި ސްޓެލްކޯގެ މެނޭޖިންގ ޑައިރެކްޓަރ ހުސައިން ފަޙްމީ ވިދާޅުވީ، ނިމިދިޔަ މަހުގައި މާލެ ސަރަހައްދުގައި ކަރަންޓް ބޭނުން ކުރެވުނު ނިސްބަތް އޭގެ ކުރީ މަހާއި އަޅާބަލާއިރު ދަށް ވެފައިވާ ކަމަށެވެ. މިގޮތުން މާލޭގެ %94 އިންސައްތަ ގޭބިސީގެ ކަރަންޓް ބިލްތައް ކުރީމަހަށް ވުރެ ކުޑަ ކަމުގައި ފަހުމީ ވިދާޅުވިއެވެ.

ފަހުމީ ވިދާޅުވީ، ބައެއް ގޭ ބިސީތަކުގެ ކަރަންޓް ބިލްތައް އެކަށީގެންވާ މިންވަރަށް ވުރެ ބޮޑުވެފައިވާކަން ސްޓެލްކޯއަށްވެސް ފާހަގަވެފައިވާތީ އެކަންކަން ބެލުމުގެ މަސައްކަތް ކުރަމުން އަންނަ ކަމަށެވެ. މިގޮތުން ކަރަންޓް ބިލްތައް މާލެއިން ބޮޑު ކަމަށް ފާހަގަވެފައިވާ %6 ގޭބިސީ އާއި ހުޅުމާލޭގެ %15 ގޭބިސީއަށް ސްޓެލްކޯގެ ޓެކްނިކަލް ޓީމްތައް ޒިޔާރަތްކޮށް އެ ގޭބިސީތަކުގައި ދިމާވެފައިވާ އަސްލު މައްސަލައަކީ ކޮބައިކަން ދެނެގަތުމުގެ މަސައްކަތް ކުރެވުމަށް ނިންމަވައި އެމަސައްކަތް ފައްޓަވާފައިވާ ކަމުގައިވެސް ފަޙްމީ ވިދާޅުވިއެވެ.

ފަހްމީ ވިދާޅުވީ، މާލޭގައި ބިލް ބޮޑުވެފައިވާ %6 އިންސައްތަ ގޭބިސީ އާއި ހުޅުމާލޭގެ %15 ގޭބިސީގެ ބިލް ބޮޑުވި ސަބަބެއް ބެލުމަށްޓަކައި، އެނާޖީ އޮޑިޓެއް ކުރުމަށް ނިންމާފައިވާ ކަމަށެވެ. މިގޮތުން އެޕާޓްމެންޓްތަކުގެ ހާލަތާއި ބޭނުންކުރާ ކަރަންޓް އާލާތްތަކާއި ސަބަބުތައް ބަލައި ކަސްޓަމަރުންނަށްވެސް އެކަމާއި ގުޅޭ މައުލޫމާތުތައް ފޯރުކޮށްދޭނެ ކަމުގައި ފަޙްމީ ވިދާޅުވިއެވެ. އެކަމުގެ ސަބަބުން ކަރަންޓް އިޤުތިޞާދު ކުރުމަށް ކަސްޓަމަރުންނަށްވެސް މަގުފަހިވެގެން ދާނެ ކަމުގައިވެސް ފަޙްމީ ވިދާޅުވިއެވެ.