ހުކުރު ދުވަހު ބޭއްވި އެމްޑީޕީގެ ޤައުމީ މަޖިލީހުގެ ދާއިރާތަކުގެ ބައި-އިލެކްޝަންގައި މާލެ ދާއިރާގެ ރައީސް ކަމަށް ވާދަކޮށް، ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ ކުރީގެ މެންބަރު މުހައްމަދު ފަލާހުގެ މައްޗަށް މާލޭގެ މޭޔަރު އާދަމް އާޒިމް ބޮޑު ކާމިޔާބީއެއް ހޯއްދަވައިފިއެވެ.

އެމްޑީޕީއިން މިހާރު ވަގުތީ ނަތީޖާ އިއުލާންކޮށްފައިވާއިރު، އާޒިމް އަށް ލިބިވަޑައިގަތީ ޖުމްލަ 1079 ވޯޓެވެ. އަދި ފަލާހަށް ލިބިވަޑައިގެންނެވީ 470 ވޯޓެވެ.

އާޒިމްގެ ތާއީދު ބޮޑަށް އިތުރު ވެގެން ދިޔައީ، ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި އެމްޓީސީސީ ހިންގެވުމާ ހަވާލުވެވަޑައިގެން ހުންނަވައި، ރާއްޖޭގައި އޭރު ހިންގުނު އުމްރާނީ ތަރައްގީގެ ގިނަ މަސައްކަތްތަކެއް ކާމިޔާބުކަމާއެކު ހިންގެވުމުންނެވެ.

އާޒިމް އެމްޓީސީސީ ހިންގެވުމާ ހަވާލުވެލެއްވީ ޖުމްހޫރީ ޕާޓީގެ ސްލޮޓެއްގައެވެ. އަދި އޭނާ ވަނީ ރިޔާސީ އިންތިހާބުގައި ޖޭޕީގެ ސްޓޭންޑާ ދެކޮޅަށް އެމްޑީޕީ އަށް ތާއީދު ކުރައްވާފައެވެ.

އޭގެ ފަހުން އޭނާ އެ ޕާޓީ އާ ގުޅިވަޑައިގެން އެމްޑީޕީގެ ޓިކެޓުގައި މާލޭގެ މޭޔަރު ކަމަށް ވާދަ ކުރައްވައި އެ އިންތިހާބު ކާމިޔާބު ކުރެއްވިއެވެ.